Ukaleq Slettemark EM-imi angusarissaartorujussuuvoq
Sisoraatinik ooqattaasarluni inuussuttuni nunarsuarmi pissartaq Kalaallit Nunaaninngaaneersoq
Ukaleq Slettemark uani sapaatip akunnerani aamma pissartanngorniunnermi allami peqataavoq,
tassalu europami inuusuttut pissartanngorniunneranni, Norgemi Sjusjøenimi maannakkut unammissutigineqartumi.
Manna tikillugu marloriarluni normu 12-inngorpoq, siullermik kisimiilluni unamminermi 12,5 kilometerisut isorartutigisumi kiisalu sprinterluni unamminermi 7,5 kilometerisut isorartutigisumi.
Angusarineqartut taakkua marluk sisorartartut 100-it sinneqartut unammeqataaffigaat.
Ukaleq Slettemarkip ataataa pissartanngorniunnermilu ikiortaa, Øystein Slettemark tulluusimaarpoq.
- Angusarissaartorujussuuvoq, Øystein KNR-imut oqarpoq.
Aatsaat taama angusarissaartigigunarpoq
Pingaartumik sprinterluni sukkaniunnermi arfininngormat unammissutigineqartumi normu 12-inngornera nuannaarutigineqarpoq. -Tassani unamminermi marloriaannarluni igeriartoqartussaavoq sisoraatinillu sukkaniunneq pingaaruteqarnerulluni, Øystein Slettemark KNR-imut taama oqaluttuarpoq.
- Sprinterluni sukkaniunnermi ullumi ingerlanneqartumi normu 12-inngornera maannamut angusarisimasaani ajunnginnerpaagunarpoq, Øystein oqarpoq.
- Tassami ajugaasumit franskiusumit sekuntinik 55-nik kingusinnerulaaginnarpoq, sisoraatinillu sukkaniunnermi Norgemiut Svenskillu unammisartui tunulerigamigit, Øyestein oqaluttuarpoq.
Taassuma ilanngullugu erseqqissaatigaa, sukkaniuteqataasorpassuit Ukaleq Slettemarkimit siulliullutik apuuttut, ukiunik pingasunik sisamanillu ukioqqortunerummata, taamaattumik siunissami angusassai neriunaateqarluarmata.
Sapaammi unamminissami 10 kilometerisut isorartutigisoq unammissutigineqassaaq, Ukaleq Slettemarkimilu normu 12-ulluni aallaassaaq.
- Sisoraatinik sukkaniulluni ooqattaasarnermi sisamariarluni igeriartoqassaaq, Ukalerlu nakersuummat angusarissaarnerit qulit akornaniinnissaa Øyesten Slettemarkip eqqoriarpaa.
AAMMA ATUARUK Ukaleq Slettemarkip Norge Cuppimi peqataanini unitsikkaa
