Ukaleq Slettemark assakaasulinnik sisoraaserluni Norgemi sølvinnappoq
Sisoraaserluni ooqattaasartartup Ukaleq Slettemarkip nunarsuarmi kakkannerpaat qaninngoorlugit unammisaqattaarpoq.
Assakaasulinnik sisoraaserluni Norgemi pissartanngorniuttoqarnerani 10 kilometerimt ataatsikkut aallarluni Lillehammermi OL-mut unammersuartarfimmi unamminermi sølvinnappoq. Sisoqqarinnera ujaminnattut akornanniinneranut pissutaavoq ingerlaarnermini 20-riarluni ooqattaasarnermi sisamariarluni uniorami.
- Ataatsikkut aallarluni unamminermi tullersortaallunga apuunnera naammagisimaarpara sisamariarlunga unioraluarama. Aamma sisoraasersornermi sukkanermut tulliunera naammagisimaarpara, Ukaleq Slettemark KNR-mut oqarpoq.
Uniornerit akisupput
Sisoraatimini assakaasulinni aamma 7,5 kilometerimut naatsumut unamminermi sukkalisaarluaraluarpoq U-23-ni sukkanersamut tulliugami. Tassani Norgemi U-23-ni unammisartoq Synne Owren ukioqatimini taamaallaat iniorpaa. Ukaleq Slettemark aamma arnani inersimasuni siorna sukkanersaasmit Tiril Echoffimit sekundinik 40-nnarnik arriinneruvoq taannalu aamma 2018-mi OL-qarnerani kultinnattuuvoq.
AAMMA ATUARUK Ukaleq Slettemark assakaasulinnik sisorarluni unammeqqaarpoq
Sisamariarluni uniorneq tassani Ukaleq Slettemarkip kinguarsaatigaa taamalu naatsumut unamminermi qulingiluaattut inissilluni.
Ooqattaasarnertaani sukkatsisarluni sungiusarnerit amerlissapput. Isumaqarpunga ooqattaasarnissaq sioqqutilaarlugu qanoq timip sukataartitsiginissaa naatsorluarsinnaaleraanni iluaqutaassaqisoq, Ukaleq Slettermark oqarpoq.
Aqqaluaa Sondre Slettemark aamma unammeqataavoq. Naatsumut unamminermi taanna aamma sisamariarluni uniorpoq angutinilu ukioqatigiinni M-18-ni 14-ttut inissilluni.