Kalaaleq sisoraaserluni ooqataasartartoq Ukaleq Slettemark, Kinami februaarimi ukiuunerani OL-ertoqarnissaanut atatillugu Italiap qaqqarsuini piareersaleruttorpoq.
20-nik ukiulik World Cupimi unammiuaarnermi tallimanngormat tassani peqataavoq, ooqattaasarnermi eqqorniagassat 20-t akornanni 18-it tassani eqqorlugit. Unammiuaarnermi tassani peqataasut katillugit 96-it akornanni Ukaleq Slettemark normu 62-inngorpoq.
- Sungiusarluarsimasutut misigisimassaguma suli sungiusarluartariaqartutut misigisimavunga. Ooqattaasartarnikkali iluarisimaarpakka, Kalaallit Nunaanni ooqattaasartartut kattuffiat tusagassiutinut nalunaarummi ilaatigut allapput.
- Antholzip qoorua atuarlugu tiffasinnerusumut maanna nuussaagut, Beijingimilu OL-ertoqarnissaanut atatillugu sungiusaqatigiissalluta, Ukaleq Slettemark oqarpoq.
AAMMA ATUARUK Ukaleq Slettemark ukiuunerani OL-eqarnissamut peqataasussaanngorpoq
Ukaleq Slettemark ukiuunerani OL-ertoqarnissaanut piareersartoq, aqqaluaa 17-inik ukiulik Sondre Slettemark inuusuttut Finlandimi ukiuunerani ukioq manna marsimi OL-ernissaannut annguppoq.
Inuusuttut nunarsuarmi pissartanngorniunnissaannut, USA-mi februaarimi pisussamut, taassuma saniatigut aamma peqataassaaq.
Assi: Siv Olsen
Unammiuaarnermilu ataatsimi ajugaasimalluni unammiuaarnissanut taakkununnga peqataassaaq.
Angutimmi inuusuttut 17-it 19-illu akornanni ukiullit Norges Cupimi akunnerup naanerani unammiuaarneranni Sondre Slettemark siullerpaamik ajugaavoq:
- Sisoraaserlunga sungiusarnerpassuamma, ooqattaasartarfimmilu sungiusarnerpassuamma imminut akilersinnaalernerat takullugu nuannaarutigeqaara, Sondre Slettemark oqarpoq.