Ujaasineq taamaatittoq: Ujaarineqartut marluk ajunngitsut nassaarineqarput
Issittumi Sakkutooqarfimmeersut aamma Kalaallit Nunaanni Politiit angummik arnamillu umiatsiarlutik Ilulissaniit aallarsimasunik ataasinngornermi annaassiniarlutik aallartipput. Maqaasineqartut taakku marluk Issittumi Sakkutooqarfiup timmisartuanik Challengerimik ujaarineqarput, aamma politiit angallataat Kimik ujaarinneqataavoq.
Maqaasineqartut taakku marluk nassaarineqarmata ujaarineqarunnaarput.
Issittumi Sakkutooqarfik KNR-imut taama ilisimatitsivoq.
- Ujaarisavut ullup qeqqata missaani nassaarigivut uppernarsarsinnaavarput, taakkualu politiit angallataannik Kimik-mik aaneqaleruttorput, Issittumi Sakkutooqarfiup tusagassiinermi akisussaasua Camilla Schouw Broholm oqarpoq nangillunilu:
- Ajoqusersimarpasinngillat.
Nassaarineqartut taakku marluk Ilulissaniit Qeqertarsuarmukartillutik ikkarlissimasut, taanna oqarpoq.
Nassaarineqartut timmisartumit Challengerimit politiit angallataannik aaneqarnissamik tungaanut qulangiuaarneqassapput.
- Nassaarineqartut toqqissisimaqqullugit annaanneqalernerannillu paasinnequllugit timmisartutsinnit qulangiuaarneqassapput, Camilla Schouw Broholm oqarpoq.