Uivertoqarani: Ajunaarnersuaqarnissaanut kalerrsisaarut kukkuneruvoq
![](/sites/default/files/styles/image_934x467/public/article_images/280658157_685070875940099_6782955734787201519_n_0.jpg?itok=LNdNpoG3)
Nuummi umiarsualivimmi nutaami Qeqertanumi containerimi puiaasat gassimik imaqartut marluk ullaaq 9.30-p missaani uppipput.
Containeri gassinik puiaasanik angisuunik imaqartoq imaarneqaleruttortoq gaffeltruckip palleteq uppisittoorpaa, taamaalillunilu puiaasanit gassimik aniasoqarluni.
AAMMA ATUARUK Nuummi containerimi puiaasaq gassimik imalik uppittoq
Qatserisartut tamatuma kingorna ajunaarnersuaqarnissaanut kalerrisaarut aallartippaat – tamannali kukkuneruvoq.
Kalaallit Nunaanni Politiinit politikommissæri, Carl Sværd KNR-imut oqarpoq.
- Ajunaarnersuaqarnissaanut kalerrisaarutip aallartinnera teknikkikkut pissuteqarpoq. Ikuallattoqarneranut kalerrisaarut nalinginnaasoq qatserisartunut, peqqinnissaqarfimmut politiinullu aallartittussaagaluarpoq, Carl Sværd oqarpoq.
Sumiiffik politiit qatserisartullu misissueqqissaarnerani assersorneqarallarpoq, politiillu ulorianartoqanngitsutut nalileereerneratigut aqqutip assersorneqarnera atorunnaarsinneqaqqilluni.
Oqartussat pisumik nakkutiginnissaapput, gassilli eqqaani innaallattoqarsimagaluarpat tamanna ajornerungaatsiassagaluarpoq.
- Arlaat pujortarsimagaluaruni, containerit marluk qaarsimasinnaagaluarput. Sumiiffimmi maani ulorinartoqangaatsialersinnaagaluarpoq, Carl Sværd oqarpoq.
Ajunaarnersuaqarneranut kalerrisaaruteqartoqarnerani
Nuummi inuit ajunaarnersuaqalernissaanut kalerrisaarut kukkunerusoq soorunami ilisimanngilaat.
Politikommissærip oqarnera naapertorlugu kalerrisaarutip appinnerani angerlarluni radio ikinneqartussaavoq.
- Innuttaasut ajunaarnersuaqalernissaanut kalerrisaarutip piffissami nalinginnaanngitsumi aallartinnera tusaagaanni angerlarluni KNR Radio ikinneqarsinnaavoq, Carl Sværd oqarpoq.
Tassani upalungaarsimanermut nalunaaruteqartoqassaaq, tassa susoqarneranik nalunaarutigineqarlunilu qanoq iliornissamut ilitsersuussisoqassaaq.