Ataatsimiititaliaq isornartorsiuivoq: Allat kinguneqartitsiumaarput

Kukkunersuiunermut ataatsimiititaliap nalunaarusiaq pillugu aalisarnermut naalakkersuisoqarfimmut isornartorsiuingaatsiarpoq, tamannalu kinguneqartinneqassanersoq, Naalakkersuisut Inatsisartullu aalajangissavaat.

Kukkunersuiunermut ataatsimiititaliami siulittaasoq, Erik Jensen (S) taama oqarpoq.

- Isumaqarpunga inatsisartut immaqaluunniit naalakkersuisut siulittaasuata arlaatigut oqaaseqarfigiguniuk pitsaanerusoq,

Kukkunersiuinermi ataatsimiititaliamiit Erik Jensenip aalisarnermut naalakkersuisoqarfik taama isornartorsiorpaa.

AAMMA ATUARUK Naalakkersuisup aalisarnermut naalakkersuisoqarfimmi sulinerluttoqanneqannginneraraa

Aalisarnermut naalakkersuisoqarfik pillugu naammagittaalliuutit arlallit kukkunersiuinermut ataatsimiititaliamut tunniunneqareernerata kingorna, Deloitte aalisarnermut naalakkersuisoqarfimmi misissuissasoq, kukkunersiuinermut ataatsimiititaliamiit piumasarineqartoq, Erik Jensen oqarpoq.

Pitsanngorsaasoqartoq

Pisassiissutinik aamma akuersissutinik ingerlatsinermi suleriaatsinik naapertuutinngissinnaasunik takunnissinnaalluni naliliisinnaasutut periarfissaammat piukkunnartoq, Aalisarnermut, piniarnermut nunalerinermullu naalakkersuisoqarfimmit, kukkunersiuineq ilassilluarneqartoq naalakkersuisoq oktobarimi akissuteqaammini allappoq.

Nalunaarusiami pitsanngorsaanissamut inassuteqaatit atuutilersinniarlugit suliat ingerlapput.

Tamannalu aalisarnermut, piniarnermut nunalerinermullu naalakkersuisup, Jens Immanuelsenip uppernarsarpaa.

Kukkunersiuinermut ataatsimiititaliamiillu kinguneqartitsisoqartariaqarsorineqarnera ima akissuteqarfigaa:

- Taanna pillugu annerusumik oqaaseqarsinnaanngilanga. Maani suliffeqarfissuarmi immikkoortortaqarfissuarmi sulisut ullut tamaasa angusaqarniarlutik ulappupput.

Isornartorsiuingaatsiarpoq

Misissuinermilu inerniliunneqartut, kukkunersiuinermi ataatsimiititaliamit isornartorsiorneqangaatsiarput.

Inuussutissarsiutigalugu aalisarnermut pisassiissutinik akuersissutinik qinnuteqarnermi akileraarsinnaatitaanermi aamma najugaqarsinnaatitaanermut uppernarsaatit nakkutigineqartannginnerat ilaatigut isornartorsiorneqarput.

- Tunngavilersuutit naammaginartumik, qulaajaanerup aamma takutippaa. Tassaappullu ilaatigu tamakku tunngavigalugit uparuaaneq sakkortuumik imaqartinneqartoq, Erik Jensen oqarpoq.

AAMMA ATUARUK Kukkunersiuinermut ataatsimiitialiap aalisarnermut naalakkersuisoqarfik sakkortuumik uparuaraa

Pisassiissutinik qinnuteqartoqartillugu itigartitsisoqaraangat, naalakkersuisoqarfik paasissutissiisannginnera, ilaatigut isornartorsiorneqangaatsiarpoq. Inatsisitigummi piumasaqaataagaluarpoq. Tamannalu Aalisarnermut naalakkersuisumit, Jens Immanuelsenimit, nassuerutigineqarpoq:

- Tassa taanna aamma isertuunneqanngilaq, sanngiiffigineqartuni ilaasimammat, taannalu uparuarneqarmat aamma aaqqiivigineqarsimalluni.

Ukiarli nalunaarusiaq ilisimaneqarpoq 

Nalunaarusiap tunngavilersuutai ukiarli 2020-imi kukkunersiuinermut ataatsimiititaliamut tunniunneqarput. Nalunaarusiap immikkoortoq siulliat septembarimili tunniunneqarpoq, tamakkiisorlu oktobarimi tunniunneqarluni.

Kukkunersiuinermut ataatsimiititaliarli aatsaat isornartorsiunni saqqummiuppaa. Tamannalu ukiaanerani ataatsimiittoqarneranik, naalakkersuisullu siulittaasuanut nipisattassiissutinut suliamut tunngatillugu, suliassat ataatsimiititaliap pingaarnersiuisariaqarsimaneranik peqquteqartoq, Erik Jensen nassuiaavoq.

AAMMA ATUARUK Tamaat isigalugu: Nipisattassiissutit Kim Kielsenimullu tatiginninnginneq paasisaqarfigiuk

- Inatsisartuni ataatsimiinnikuupput aammalu allanik pingaarutilinnik sammisaqangaatsiarnikuulluta. Taamaattumik aatsaat massakkut ukioq nutaaq aallartereersimalersoq uuma saqqummiunnera ingerlanneqartariaqalersimalluni, Erik Jensen oqarpoq.