Naalakkersuisup aalisarnermut naalakkersuisoqarfimmi sulinerluttoqanneqannginneraraa

- Aalisarnermut naalakkersuisoqarfimmi suliassanik suliarinnittarnitsinni pikatattorujussuarmik suleriaaseqanngilagut.

Aalisarnermut, piniarnermut nunalerinermullu naalakkersuisoqarfik tusagassiuutinut nalunaarummi allappoq.

Kukkunersiuinermut ataatsimiititaliap suliamik isumaginnittarnermik isornartorsiuneratigut naalakkersuisoqarfik tallimanngormat isornartorsiorneqarpoq. Isornartorsiuineq isornartorsiuinermi 1-imit 9-mut annertussusiliinermi 7-imi inissisimavoq.

Naalakkersuisoqarfiup assersuutigalugu aalisarnermi ingerlatseqatigiiffiit akuersissutinik qinnuteqaraangata akileraartussaanermut najugaqartussaatitaanermullu piumasaqaatinik naammassinninnersut misissortannginnagit isornartorsiorneqarpoq.

Naalakkersuisoqarfiup ingerlatseqatigiiffinnit qulinit arfiniliinnaat angerlarsimaffeqarnermut kiisalu uuttuutit pillugit uppernarsaatinik nassitsisimanerat qisuariarfigisimanngimmagu Kukkunersiuinermut ataatsimiititaliap aamma ilorrisimaarutiginngilaa.

Tamanna isumaqarpoq, naalakkersuisoqarfiup tunngaviatigut nakkutilliiffigisinnaanngikkaa ingerlatseqatigiiffiit uuttuinermut allakkianik suli piginnittuunersut, angallatit Kalaallit Nunaanni angerlarsimaffeqarnersut aamma angallatit takissutsimut piginnaassutsimullu piumasaqaatinik naammassinnissinnaanersut, nalunaarusiami allassimasoq Kukkunersiuinermut ataatsimiititaliaq tusagassiuutinut nalunaarummi allappoq.

Paasissutissat pigereerai

Sulisut ingerlatseqatigiiffiit aalisariutillu nalunngereernerannik tamanna pissuteqartoq, naalakkersuisoqarfik oqarpoq. Taamaammat ingerlatseqatigiiffiit ukiut tamaasa allakkanik uppernarsaatinik tunniussinissamut piumasaqarneqarneq ajorput.

AAMMA ATUARUK Kukkunersiuinermut ataatsimiitialiap aalisarnermut naalakkersuisoqarfik sakkortuumik uparuaraa

- Aalisarnermi ingerlatseqatigiiffitta ilisimaneqartut piginnittuunermik uppernarsaatinik piumasaqaateqarfigineqarnikuunngitsut, tassa ingerlatseqatigiiffinnik ukiut tamaasa suliaqartaratta taakkulu uagut ilisimasaraagut. Angallatit angissusaannut uppernarsaatinut nunamilu sumi nalunaarsorneqarnerannut uppernarsaatinut tunngatillugu tamakku pinerit tamaasa piumasarisarnikuunngilagut, tassa angallatit amerlanersaat nalunnginnatsigit angallatillu pillugit paasissutissat tamarmik aalisarsinnaanermut akuersissutinik nalunaarsuivitsinneereermata, naalakkersuisoqarfiup pisortaa, Jørgen Isak Olsen oqarpoq.

- Tamanna oktobarimi 2020-mili iluarsineqarnikuuvoq. Piginnittuunermik uppernarsaatit, nunami sumi nalunaarsorneqarsimanerannut uppernarsaatit angallatillu angissusaannut uppernarsaatit suliaqannginnermi qinnuteqaammut qinnuteqaatini ataasiakkaani ilanngunneqartarnissat piumaasaqaataavoq, ukiup siulianut sanilliullugu piginnittut allanngorsimannerat, ingerlatseqatigiiffiup taannaaginnarnera angallatillu allanngorsimannginnera apeqqutaatinnagu.

Ilitsersuutit ersarissut amigaataasut

Naalakkersuisoqarfimmilu sulisut qinnuteqaatinik qanoq isumaginnittarnissaannut qinnuteqartullu malittarisassanik naammassinninnersut nalilersornissaannut erseqqarissumik ilitsersuuteqannginneranut Naalakkersuisoqarfik aamma isornartorsiorneqarpoq.

Sulisut malittarisassanik assigiinngitsumik paasinnissinnaapput, taamaalillunilu qinnuteqaatit assigiinngitsumik isumagineqaratarnissaannut aarlerinartoqarluni.

- Ingerlatseqatigiiffik ukiup siuliani aalisarsinnaanermut akuersissuteqarnikuuppat aalisarsinnaanermut akuersissummik tunineqarsin¬naasoq. Qinnuteqartut aalajangersagaq taanna innersuussutigalugu akineqartarnikuupput, tamannalu naamalluinnartutut isigineqarnikuuvoq, Jørgen Isak Olsen oqarpoq.

Naalakkersuisoqarfilli aqutsinermi misissuinermi inassuteqaatit tunngavigalugit aqutsinermi suleriaatsimik sukaterinikuuvoq.

"Soorunalumi ilaatigut kukkusoqartarpoq..."

Naalakkersuisup, Jens Immanuelsenip (S) naalakkersuisoqarfiup pisortaa taperserpaa.

- Aalisarnermik aqutsinermi pitsaasumik suleriaaseqartoqarnissaa malillugu suliassanik suliarinnittoqartarnera tatigilluinnarpara, Jens Immanuelsen (S) oqarpoq.

- Allaffeqarfik aqutsiveqarfimmut angisoorujussuarmut sanilliullugu sulisukitsuararsuuvoq soorunalumi ilaatigut kukkusoqartarpoq, ataatsimulli isigalugu aalisarnermik aqutsinerup pitsaasusaa qaffasissorujussuuvoq.

- Ilisimatitsissutigerusupparali naalakkersuisoqarfik internetikkut paasissutissiisarnerup qaffasissusia pitsanngorsarniarlugu suliamik annertuumik maannakkut suliaqartoq

Jens Immanuelsenip oqarnera naapertorlugu nittartagaq sullissivik.gl maannakkormit atoruminarnerulersinniarlugu nutarterneqaleruttorpoq.

Jens Immanuelsenip oqarnera naapertorlugu uku suliarineqarput: 

• Piumasaqaatinik, akuerineqarnissamut piumasaqaatinik, qinnuteqartarnermik, suliassanik suliarinnittarnermik allaaserisanik nammattunik atuisuniillu atoruminartunik suliaqartoqarnikuuvoq, taamaaliornermilu maannakkut nittartakkamiittunik aalisartunut paasiuminarnerulersitsinissaq atuisuniillu atoruminarnerulersitsinissaq qulakkeerneqassalluni.
• Qinnuteqarnermi immersugassat tamarmik nutarterneqarnikuupput aqutsinermillu misissuinermi inassuteqaatit malinneqarlutik, qinnuteqarnermut killissarititanik aamma angallatit pillugit uppernarsaataannik piginnittuunermillu uppernarsaatinik erseqqissaaneq ilanngullugu.
• Qinnuteqarnermi immersugassat aamma nittartakkamiilissapput, taamaalilluni qinnuteqarnermi immersugassat siunissami digitalinngorlugu immersorneqarsinnaalissallutik Naalakkersuisoqarfimmullu toqqaannartumik nassiunneqartassallutik