Tysklandimi juutit illersorneqarnerunissaminnik piumasaqartut
Tysklandimi juutinik qinngarsuineq Israelip Hamassillu Kangia Qiterlermi akerleriinneranni sakkortusivoq.
Taamaammat Tysklandimi juutit illersorneqarnerunissaminnik kissaateqarput.
- Anguniagassatut nalunaarutiinnarmit annerusumik piumasaqarpugut, ersoqatigiinnermut nalunaaruteqarnermit annerusumik piumasaqarpugut, Tyskandimi juutit qitiusumik isumalioqatigiissitaanni siulittaasoq Daniel Botmann akerliussutsimik Berlinimi takutitsinermi oqarpoq.
Akerliussutsimik takutitsineq Israelimut tapersersuinermik takutitsineruvoq.
Kangia Qiterlermi akerleriinnermut atatillugu uumissuinermut atassuteqartunik pinerlunnerit 1100-t nalunaarsorneqarsimasut, Tysklandip nunamut namminermut ministeria Nancy Faeser tallimanngormat oqarpoq.
Hamasip Israelillu saqitsaannerat oktobarip ulluisa arfineq-aappaanni sakkortuseqqippoq. Tassani Hamasimeersut Gazamit Israelimut iseriarlutik israelimiunik 1400-nik toqoraapput. Hamas inunnik 200-nik sallunaveeqqutitut aamma tigusaqarpoq.
Meeqqat isumannaassusaat pillgugu annilaangasut
Israel Gazami Hamasimut taamanili qaartartumeerisarpoq, palæstinamiullu sakkutuujunngitsut hunnorujut tusintilikkuutaat qimaasariaqarsimallutik.
Saqitsaannermut akerliussutsimik nunarpassuarni takutitsisoqarpoq, tassalu aamma Tysklandimi.
Tysklandimi juutit iliuuseqartoqarnissaanik piumasaqartut, Botmann akerliussutsimik Brandenburger Torimi takutitsinermi oqarpoq.
Juutit angajoqqaat meeqqamik ajoquserneqarnissaannik annilaangasarnissaat isumatsannartoq, taanna oqarpoq.
Juutinik qinngarsuinerup sakkortunermik kinguneqartarnissaa taassuma kissaatigaa.
- Pisariaqassappat, juutinik qinngarsuisumik nilliasut tyskisullu innuttaassuseqanngitsut anisitaasariaqarput. Tyskisut innuttaassusillit sakkortuumik pillarneqartariaqarput.