TV2-mi pisortaq isornartorsiorneqareernermi kingorna soraartoq

Danskit tusagassiorfiata TV 2-p ilanngutassiaq Múte B. Egedemut (IA) tunngasoq Inatsisartunut qinersisoqarnissaanut ullut sisamat sioqqullugit apriilip ulluisa aappaanni saqqummersippaa.

Ilanngutassiaq ”Bejleren til at blive Grønlands nye lede undlod at erklære sig inhabil i to sager”-imik tassa Kalaallit Nunaanni siulittaasunngorniartoq suliani marlunni attuumassuteqarpallaarnerminik nalunaaruteqarsimanngitsumik quleqataqarpoq.

Ilanngutassiaq inoqatinut attaveqaatitigut siammarterneqangaatsiarpoq.

AAMMA ATUARUK Tusagassiuutit: Aaqqissuisoqarfiup pisortaata Múte B. Egede pillugu oqaluttuaq upperigaa

Ilanngutassiaq Múte B. Egedep 2018-imi aatsitassanut naalakkersuisuunermini attuumassuteqarpallaarnerminik nalunaaruteqarsimannginneranut taamaalillunilu nammineq ingerlatseqatigiiffiutiminut aningaasanik iluanaaruteqarsimaneranut tunngavoq.

Oqaatigineqartulli kukkupput. Oqaluttuarmimi eqqortoqanngilaq. Ekstra Bladet taama allaaserisaqarpoq.

Ulla Østergaardip nammineerluni Facebookikkut TV2-mi aqutsisoqarfiup pisortaatut maanna soraarnissani allaaseraa.

Taanna inatsisartunut qinersinermi Muté B. Egede pillugu eqqunngitsumik ilanngutassiorpoq, tamannalu pissutigalugu isornartorsiorneqareerluni soraarpoq.

Ulla Østergaard aviisimit Ekstra Bladetimit, qanoq ililluni ilanngutassiorsimanera allaaserineqarpoq. Taassumalu kingorna TV2-p ilannguatassiaraluani tunuartippaa.

AAMMA ATUARUK TV 2-mi pisortaq isornartorsiorneqareernermini napparsimalluni sulinngiffeqartoq

TV2-p tusagassiornermut pisortaata, Ulla Porsip siornatigut oqaatigaa TV2 Kalaallit Nunaanni qinersisoqarneranut sunniiniarsimanngitsoq.

- Ilanngutassiaq pillugu ajuusaaqaanga. Saqqummiunneqanngisaannartussaasimagaluarpoq. Taamaakkaluartoq qulaajaaninni paasivara kinaluunniit TV2-mi piaaraluni kukkuluttorsimanngitsoq, taama Ulla Pors sapaatiummat “Presselogen”-imiinnermini oqarpoq.

Kia ilanngutassiaq TV2-mut tunniussimaneraa ulloq manna tikillugu ilisimaneqanngilaq.