Tusagassiuutit: Aaqqissuisoqarfiup pisortaata Múte B. Egede pillugu oqaluttuaq upperigaa

Danskit tusagassiorfiata TV 2-p ilanngutassiaq Múte B. Egedemut (IA) tunngasoq Inatsisartunut qinersisoqarnissaanut ullut sisamat sioqqullugit apriilip ulluisa aappaanni saqqummersippaa.

Ilanngutassiaq ”Bejleren til at blive Grønlands nye lede undlod at erklære sig inhabil i to sager”-imik tassa Kalaallit Nunaanni siulittaasunngorniartoq suliani marlunni attuumassuteqarpallaarnerminik nalunaaruteqarsimanngitsumik quleqataqarpoq.

Ilanngutassiaq inoqatinut attaveqaatitigut siammarterneqangaatsiarpoq.

Ilanngutassiaq Múte B. Egedep 2018-imi aatsitassanut naalakkersuisuunermini attuumassuteqarpallaarnerminik nalunaaruteqarsimannginneranut taamaalillunilu nammineq ingerlatseqatigiiffiutiminut aningaasanik iluanaaruteqarsimaneranut tunngavoq.

Oqaatigineqartulli kukkupput. Oqaluttuarmimi eqqortoqanngilaq. Ekstra Bladet taama allaaserisaqarpoq.

Ipertiteriniarnerit qinersisoqannginneranni aallartittut

Ekstrabladet naapertorlugu TV 2-p nutaarsiassaqartitsiviani aaqqissuisut pisortaat, Ulla Østergaard ilanngutassiortuuvoq.

- Ekstra Bladetip paasissutissaatai naapertorlugit Ulla Østergaard nutaarsiassamik aallarnisuuvoq, Taassumalu pissutsit ilisimanngisat aallaavigalugit tusagassiortut marluk allaaserinnitsippai, Ekstra Bladet allappoq.

Múte B. Egede (IA) Inatsisartunut qinigaanerpaasup qinersisoqarnissaanut sunniuteqartoqarniarsimanissaa qularutiginngilaa.

- Qinisisoqanngitsiarnerani saqqummernera quarsaarutigaara. TV 2-llu ingammik Ulla Østergaardip allaffigeqatigineratigut pissutsit aqunneqanngitsut ersarissumik takusinnaavara. Tamanna tunngavigalugu nunatsinni qinersisoqarnissaanut sunniiniutigalugu tamanna oqaluttualiaannaasoq TV 2-llu aaqqissuisoqarfiata pisortaata upperisimagaa kisiat takusinnaavara, Múte Egede Ekstra Bladetimut oqarpoq.

Múte B. Egedep pasilliutigineqartut nammineerluni aamma Facebookikkut eqqunngitsuunerarpai.

- Qinersinissarput qallivoq naatsorsuutigeriikkattullu ipertiteriniarnerit massakkut aallartipput, Múte B. Egede Facebookikkut taamani allappoq.

TV 2 ajuusaartoq

TV 2-p ilanngutassiaq qinersisoqareernerani aatsaat ajuusaarutigaa. Ilanngutassiap qulequtaa ilanngutassiarlu aamma peerneqarlutik allanngortinneqarput.

- TV 2 Nyhedernep kalaallimut politikerimut Múte B. Egedemut tunngatillugu ilanngutassiaq apriilip ulluisa aappaanni saqqummersinneqartoq ajuunaarutigaa, TV 2 allappoq.

- TV 2-p ilanngutassiamik saqqummersitsineq kukkunerusoraa, ilanngutassiamimi attuumassuteqarpallaarsimaneraaneq uppernarsaatissaqartinngilarput. Tamatuma saniatigut Egedep ilanngutassiamut tunngatillugu oqaaseqarnissaanut saqqummiiffigineqarsimannginnera isertuanngitsumik kukkuneruvoq. Ilanngutassiaq taamaalilluni TV 2-p pitsaassutsimik nakkutiginnittarneranik naapertuinngilaq.