Tusagassiuut: Pikitsitsisut Syriami Damaskus ungugaat
Pikitsitsisut Syriap illoqarfiisa pingaarnersaat Damaskus arfininngornermi ungujartulerpaat.
Nutaarsiassaqartitsivik AFP naapertorlugu, pikitsitsisut taama paasissutissiipput.
Pikitsitsisut Syriami nunap immikkoortuini arlaqartuni siuariartortut arlalinnit ullumi nalunaarutigineqarpoq.
Pikitsitsisut pingaartumik Syriap avannaata kippasissuani maannamut siuariartoraluartut, Damaskusimut kujasinnerusumiittumut arfininngornermi qanillipput.
Syriap ukiorpassuarni præsidenterisaa Bashar al-Assad, taassumalu ilaqutai, Damaskusimi najugaqarput.
Assad ukiumi 2000-imi præsidentinngorpoq. Ataatani Hafez al-Assad præsidentitut taamani kingoraarpaa.
Aamma Syriap sakkutuui qulikkuutaat Irakip sakkutuuinik isumaqateqartoqareertoq Syriamit Irakimut Al-Qaimimi killeqarfitsigut qimaasimasunngooq nalunaarutigineqarpoq.
Sumiiffimmi oqartussaasut Reutersimut taama paasissutissiipput.
Pikitsitsisut Syriami ulluni kingullerni saassussisaqattaarput. Naalagaaffiulli sakkutuui illoqarfiit pingaarnersaata eqqaani sumiiffinnit tunuartersinameranngillat.
- Sakkutuutta illoqarfiit pingaarnersaat Damaskus ungungajalerpaat, AFP naapertorlugu, pikitsitsisut naalagaasa ilaat Hassan Abdel Ghani oqarpoq.
Sakkutuut illoqarfiup qanittuanit qimaasimanissaat Syriap illersornissamut ministereqarfianit ilumuunnginnerarpaat.
- Sakkutuutta Damaskusimiittut tunuartersimanissaannut nutaarsiassat ilumoortortaqanngillat, AFP naapertorlugu nalunaarput.
Pikitsitsisut illoqarfinnik arlalinnik Syriap sakkutuuinit nakkutigineqaraluartunik sapaatit akunnerini marlunni kingullerni tiguaapput.
Pikitsitsisut Syriami illoqarfiit annerpaat ilaanniittunik soorlu Aleppomik Hamamillu tiguaapput. Illoqarfiit taakku marluk nunap kippasissuaniipput.
Pikitsitsisut Hayat Tahrir al-Shamimit, aamma HTS-imik taaneqartartumit siuttuuffigineqarput.
HTS al-Qaedamik iligisaqartumit Jabhat al-Nusramit pivoq.
Jabhat al-Nusra Syriap inuisa imminnut sorsunnerata aallartinnerani pilersinneqarpoq.
Syriap inuisa imminnut sorsunnerat nunani arabiamioqarfinni 2011-mi pikitsitsinernit aallarnerneqarpoq.
