Tusagassiuutit: Bruxellesimi tigusarineqartoq pingaarnertut pasineqartuunngilaq
Belgiami tusagassiuutit ullaaq manna nalunaarutigaat Bruxellesip illoqarfiata ilaani Anderlechtimi tigusarineqartoq tassanngitsoq 25-nik ukiulik Najim Laachraoui. Nutaarsiassaqartitsivik Reuters taama allappoq.
Taanna timmisartoqarfimmi Zaventemimi ippassaq marlunngornermi saassussinermi pingaarutilimmik inisissisimasutut pasineqarpoq.
Belgiami aviisip DH-p (Derniere Heure), tusagassiuutini siullersaalluni tusarliukkaluarpaa pingaarnertut pasineqartoq 25-nik ukiulik tigusarineqarsimasoq. Maannali oqaatigineqarpoq Anderlechtimi tigusarineqartoq allaasoq.
Belgiami naalagaaffiup unnerluussissuata DH-mut ilisimatitsissutigaa ullumi nalunaaqutaq ataatsinut tusagassiortunik katersortitsisoqarniartoq.
/ritzau/