Tusagassiutit: Floridami aallaasersortoq norskisut innuttaassuseqartoq

USA-mi Florida State Universitymi sisamanngornermi unnukkut aallaasersortoqarnerani inuit marluk toqutaapput tallimallu ikiligaallutik.

Pinerluttutut pasisaq norskisut innuttaassuseqartoq, amerikami tusagassiorfiit arlallit allapput. Taanna amerikamiutut aamma innuttaassuseqarpoq, taamaalilluni marloqiusamik innuttaassuseqartuusoq, allapput.

Taama ilaatigut CNN sumiiffimmi oqartussanit issuaasartuusoq allappoq.

Pinerluttutut pasisap arnassaa sumiiffimmi politiiuvoq, taassuma sulitilluni aallaaserisarnikuusaa saassussinermi atorneqartoq, amerikami oqartussat paasissutissiisimasut, norskit tusagassiorfiat VG allappoq.

Pinerluttutut pasisaq aallaasersortoqareersoq tigusarineqarpoq.

Universitetimi ilinniartuussangatinneqartoq Reuters allappoq. Tigusarineqarnermi kingorna nakorsamik passunneqarnissaanut ingerlanneqarpoq.

Inuusuttut suliniaqatigiiffianut ilaasortaasimasoq

USA-mi oqartussat allaasersornermi sumik pissuteqarsimasinnaaneranik suli ersersitsisoqanngilaq.

Pinerluttutut pasisaq 20-nik ukioqartoq, sheriffip inuusuttunut suliniaqatigiiffiani ilaasortaanikuusimasoq, CNN allappoq.

Taanna politiit peqatigalugit sungiusarnernut arlalinnut peqataasarsimasoq, tusagassiortunik katersortitsisoqarnerani, sumiiffimmi sheriffi Walter McNeil ima oqarpoq.

- Taamaammat sakkunik tigoriaannaateqarnera uagutsinnut tupaallannanngilaq, McNeil oqarpoq.

Pasisaq sumiiffimmi politiiniit aallatissimasoq, sumiiffimmi politiit pisortaat oqarpoq.

Sumiiffiup nalunaaqutaa malillugu sisamnngornermi ullup qiterarnerani aallaasoqarneranik arlalinnik nalunaaruteqartoqarpoq.

Universitetip campusiani ilinniartunut sammisassaqartitsivimmi aallaasersorneq pisoq, amerikami tusagassiorfik allappoq. Ilaatigut aamma kantiinami.

Inummik aallaasisumik takunnittoqarnerata kingorna Universiteti aarlerisaarivoq.

/ritzau/