Politiit ullormut nalunaarutaat: Aallaasersornermi angut 26-nik ukiulik tigusarineqartoq
Kangaatsiami illumi najugaqarfiusumi angut 26-nik ukiulik aalakoorluni pingasunngornermi unnukkut aallaasersorsimasoq, Kalaallit Nunaani Politiit paasissutissiipput.
Nalunaarut unnukkut aqqaninngorluinnalersoq tiguneqarpoq, akunnerillu arfinillit qaangiuttut sisamanngornermut ullaamut tallimanngorluinnalersoq angut tigusarineqarpoq.
- Aasianni politiit kommunefogedilu apuukkamik pisoq unitsippaat tigusarinninnerlu eqqissisimasumik naammassineqartoq, politiit pigaartuisa pisortaat Preben Kleist oqarpoq.
Kangerlussuarmiit politiit SAR-ip qulimigulianik apuunniartariaqarsimanerat pissutigalugu tigusarinninnissamut akunnerit arfiniliusimanerat, politiit pigaatuisa pisortaat nassuiaavoq.
Taava politiit qanga apissippat?
- Tamanna oqaaseqarfigisinnaanngikkallarpara, politiit pigaartuisa pisortaat oqarpoq. Taamatuttaaq pisoqarnerani angut kisimi angerlarsimaffimmiissimanersoq oqaatigisinnaanngilaa. Ajoqusertoqarsimanersorluunniit aamma oqaatigisinnaanagu.
Ilulissani biilinik aallarussinerit
Kangaatsiami aallaasersortoqarnerata saniatigut Ilulissani biilinik aallarussisoqarpoq. Taamaammat innuttaasut biiliminnik isumannaarissasut politiit pigaartuisa pisortaata kajumissaarpai, pasinarsinnaasumillu takunnikkunik politiinut saaffiginneqqullugit.
- Takunnitoqarsimatillugu politiinut nalunaarutigineqartarnissaa kissaatigaarput, taamaaliornikkut maanngaanniit aallartitsisarniassagatta, Preben Kleist oqarpoq.
