Tusagassiorfiup Siumumit sassartoq akissarsiaqartinngikkaa
Siumut sinnerlugu Kommuneqarfik Sermersuumi sassartoq Sermitsiaq.AG-mut sullissisartumik suliffiuteqarpoq, tassungali toqqaannartumik toqqaannanngitsumilluunniit attuumassuteqanngitsoq, tassanngaanniit erseqqissaavoq.
- Soorunami allanit periarfissagissaarnerunngilaq, tamanna takorloorsinnaanngilarput, Sermitsiaq.AG-mi aaqqissuisoq pisortarlu, Christian Schultz-Lorentzen oqarpoq.
Oqaaseqarsinnaanermik killiliisinnaanngilagut
Aamma Nicolaj Nissen allaaserisani ilaanissamut qineqqusaaqatimisulli periarfissaqartoq, erseqqissaatigaa.
- Inuit oqaaseqarsinnaanerannik killiliisinnaanngilagut. Tusagassiorfimmi akissarsiaqarluni suligaluarpat allaassagaluarpoq, Christian Schultz-Lorentzen oqarpoq.
Danmarkimi tusagassiornermik ilinniarfissuarmi tusagassiutit pillugit inatsisileritooq naapertorlugu, Sermitsiaq.AG-sulli tusagassiorfinnut namminersortunut sassartunik partiinillu assigiimmik pinninnissaq piumasaqaateqanngilaq.
Aviisit polikkikkut soqutigisaqartut
Danmarkimi aviisit partiit qanittumik siusinnerusukkut attaveqarfigimmatigit politikkikkut isummat assigiinngitsut saqqummersittaraat takuneqarsinnaasarpoq.
- Tassa, tusagassiorfiit sassartunik nammineq pitsaanerutitaminik politikkikut isummertunik tapersiisinnaasarput. Taakkulu allanit saqqumilaartinnerusinnaallugit, tusagassiutit pillugit inatsisileritooq, Vibeke Borberg oqarpoq.
Tusagassiorfinnulli ajornartorsiutaasumik, ima isumaqartoqalersinnaavoq, qineqqusaartut ilaat tusagassiorfimmut attaveqarnini patsisigalugu allaniit saqqummisinneqarnerusoq.
Ammasumik pissuseqarneq pingaaruteqartoq
Taama isumaqartoqaqqunagu inatsisilerituup ammasumik pissuseqarnissaq kaammatuutigaa, aammami tusagassiorfiit tutsuiginassuseqaannarusussammata.
- Allaaserisamik suminngaanneerneri qanorlu suleriaaseqarnertik nassuiarpatigit, taava atuartartut namminneq isummersinnaassapput, Vibeke Borberg oqarpoq.
Nicolaj Nissenip aqqa aviisip attavigineqarsinnaasut allattorsiamaffiannikkaluartoq, toqqaannartumik attuumassuteqanngitsoq, Christian Schultz-Lorentzen oqarpoq.
Tamarmik nassuiaasersorneqarsinnaanngitsut
Tusagassiuteqarfiup siumut sinnerlugu sassartup allaaserisaanik allaaserineqarneranillu saqquussatilluni, Nikolaj Nissen imminnut qanoq attuumassuteqarnersoq ilisimatitsissutigisassappagu, iluanngitsumut ingerlalernissaq taassuma aarleqqutigaa.
- Allarpassuarnimmi aamma qinigassanngortittoqarpoq, piginneqatigiiffinni assigiinngitsuni suliffeqartunik, taamalu inissisimanerat aamma nassuiartariaqalissaaq. Inuimmi aamma oqalussinnaasariaqarput, tusagassiutinilu toqqaannartumik suliffeqanngikkunik, piumasamissut iliorsinnaasariaqarput, tusagassiorfiup pisortaa oqarpoq.
AAMMA ATUARUK Nissen immiorfiup qimannissaanut piareertoq
