Nissen immiorfiup qimannissaanut piareertoq

Heca Nuuk A/S-imi pisortaallunilu piginneqataasoq, Nicolai Nissen, Kommuneqarfik Sermersuumi, Nuuk Imermik piginneqataasumi, kommunalbestyrelsimut ilaasortanngorusuppoq.

Taasumalli soqutigisat aporaatilissannginnerarpai. Namminermi oqarpoq Godthåb Bryghusimi piginneqataassutsimi tuninissaannut piareersimalluni. 

- Oqarutta neriuutigisatsitut Siumut borgmesteriutitaqalerpoq uangalu kommunip iluani akisussaaffinnik annertuunik tigusaqarlunga, taava nammineq suliffeqarfiutinni sulisinnaajunnaassaanga kommunimili piffissaq tamakkerlugu sulilissallunga, Nikolai Nissen oqarpoq. 

- Qinersisoqareerpat inissisimanera nalilersoqqittariaqassavara. Tassami soqutigisat aporaannissaat pinngitsoortariaqarpoq. 

Taava borgmesteriutitaqalissagussi massakkut atorfinnit tunuassavit?

- Aap. Akisussaaffimmik annertuumik tigusissaguma taamaaliortariaqassaanga. 

Suliffeqarfimmi piginneqataassutitit tunissavigit?

- Aap, taamaaliortariaqarsinnaavunga, Nicolai J. Nissen KNR-imut oqarpoq.  

AAMMA ATUARUK Immiorfiit unammilleqatigiinnermut aqutsisoqarfimmut nalunaarutigineqartut

Nuuk Imeq imeruersaatit puiaasaannik kisermaassisutut inissisimavoq, tamannalu Nikolai Nissenip isornartorsiortareerpaa. Kommunalbestyrelsimullu qinigaassaguni Nuuk Imeq ineriartortikkusuppaa. 

- Immiorfiit Nunatsinniittut Nunattalu avataaniittut atugaat assigiittariaqartut isumaqarpunga. Taamaattorli Nuuk Imerup ineriartortinnissaanut periarfissanik takusaqarsinnaavunga.  

- Periarfissat tigussaasut ilagaat immiorfiit Nunatsinniittut avammut tunisassiorniarneranni Nuuk Imermit maqitsissunneqartarsinnaanerat. Taamaasillutik immiorfiutillit maqitsivinnut nutaanut aningaasaliisariaqassanngillat Nuuk Imerlu suleqatigalugu suliffissanik pilersitsisoqarsinnaalluni.

Taava Kommuneqarfik Sermersuumi siulersuisunngussaguit Nuuk Imeq ineriartortinniarpiuk? Taamatut paasisariaqarpa? 

- Aap. Nuuk Imerup matuneqarnissaa pissutissaqanngilaq Nuuk Imerup ammatiinnarnissaanut pissutissat arlaqarput. Pisortat suliffeqarfiutaattut allatuulli ineriartortinnissaa isumagissavarput. Suliassat amerlanerulersinniarlugit taamatullu aningaasarsiornerulersillugit, Siumut sinnerlugu Kommuneqarfik Sermersuumi qinigassanngortittoq, Nikolai Nissen, KNR-imut oqarpoq.