Immiorfiit unammilleqatigiinnermut aqutsisoqarfimmut nalunaarutigineqartut

Ingerlatseqatigiiffiup Heca A/S-ip, ilaatigut Nuummi akunnittarfinnik neriniartarfinnillu ingerlatsisup, pisortaa Nicolai Nissen nalunaarutiginnittuuvoq.

Nunatsinni ingerlatseqatigiiffiit unammilleqatigiinneranni sinaakkutit immiorfiit 1986-imi isumaqatigiissutigisimagaat, Nicolai Nissen isumaqarpoq.

- Carlsberg Royal Unibrewilu tuniniaanissap tunngavissaanut, nittarsaassinissamut allaallu suliffiit unammillertut nioqqutissaannik Nunatsinni tuniniaaffinni qanoq aqutsinissamik ataatsimoorluni naliliinermut isumaqatigiissuteqarsimasut malittarisassani takuneqarsinnaavoq, Nikolai Nissen Børsenimut oqarpoq.

Nalunaarutiginnittoqarsimasoq unammilleqatigiinnermut aqutsisoqarfiup uppernarsarpaa, suliamulli allamik oqaaseqarusunnani.

Unioqqutitsillunili isumaqatigiissusiortoqarnerarneq Royal Unibrewip aningaasaqarnermut pisortaata, Lars Jensenip ilumuunnginnerarpaa.

Carlsbergip suliaq pillugu saaffigineqarsimanani oqaatigaa, isornartorsiuinermullu oqaaseqarusunnani.