Tusagassiorfik: Siuleriiaattunik qaangiineq pissaanermik atornerluineruvoq
Kommuneqarfik Sermersuup borgmesteria taassumalu atorfilittai pingasut akiuussusersuisoqarneranut siuleriiaattunik sapaatip-akunnerata siuliani qaangiiginnarput.
Borgmesterimi Charlotte Ludvigsen (IA) Kommuneqarfik Sermersuumilu atorfillit pingasut atuarfimmut isaariaq alla atorlugu iserput.
Taakku akiuussutissamik kapitinngikkunik kommunip akiuussusersuiffiusup silataani siuleriiaattunik ikiuinini unitsissagaa, Namminersorlutik Oqartussat akiuussusersuinermut ataqatigiissaarisuat, Anna Wangenheim siorasaarpaat.
AAMMA ATUARUK Charlotte Ludvigsen akiuussuserneqarnissamut qaangeraanini pillugu: Ajuusaarpunga - utoqqatserpunga
Borgmesteri atorfilittanilu siuleriiaattunik qaangiiginnaruni tamanna pissaanermik atornerluinertut taanneqarsinnaavoq.
Aalborg Universitetimi inatsisilerinermik ilinniarfimmi professori Sermitsiaq.ag-mut taama naliliivoq.
- Tamanna arlaatigut pissaanermik atornerluineruvoq. Borgmesterip imminut pisinnaatinneranut pingaarnersiuinermillu avaqqussisinnaatinneranut tamanna takussutissaavoq, Sten Bønsing Sermitsiaq.AG-mut oqarpoq.
Charlotte Ludvigsenip pisoq ajuusaarutigalugu utoqqatsissutigaa. Taassuma siorasaarisoqarsimanera USK-imiinnermini ilisimanagu nassuiaatigaa. Charlotte Ludvigsenip pisoq paatsooqatigiinnermik tunngaveqarsoraa.
Kisianni Charlotte Ludvigsenip atorfilittaasalu siuleriiaattunik qaangiiginnarnerat ingerlatsinermut inatsimmi malittarisassanik unioqqutitsinerusoq, professori naliliivoq.
- Atorfilittanut tunngatillugu kinguneqartitsisoqassanersoq kommunip sulisitsisutut aalajangigassarigaa Sten Bønsing oqartoq Sermitsiaq.ag allappoq.
