Tusagassiorfik nutserutitaalertoq

Atortorissaarutinik nutaalianik kalaallisuumiit qallunaatuumut paarlattuanillu nutseruteqalernikuuvoq. Tusagassiorfik atortorissaarutinik taamaattunik nunatsinni suliffeqarfinnut neqerooruteqartalilerpoq.

Allattoq Thor Bill

novembarip 27-at 2023 07:56

Nutserisoq Hanne Petersen

Allakkat soorlu inatsisit, nutaarsiassat, iffiornermi najoqqutassat Facebookimilu oqaaseqaatit atortorissaarutinik nutserutinik nutaaliaasunik nutserneqariaannaalingajalerput.

Atortorissaarutinik nutaalianik kalaallisuumiit qallunaatuumut paarlattuanillu nutseruteqalereernikuuvoq. Atortorissaarutillu taamaattut nunatsinni neqeroorutaalingajalerput.

Tusagassiorfimmi Sermitsiaq.AG atortorussaarutinik taamaattunik pisiortoqqammertoq taakkuninnga 2024-p aallartinnerani atuilissangavoq.

Atortorissaarutit nutaaliat taakku ulluinnarni sulinerminni oqilisaassissutigissaqigitik, tusagassiorfiup Sermitsiaq.AG-p pisortaanera oqarpoq.

- Ullut tamaasa allaatigisarpassuaqartarpugut, ajunngeqisunillu kalaallisut qallunaatullu allatanik saqqummiussisarluni. Atorissaarutitaavullu taakku kalaallisuumiit qallunaatuumut paarlattuanillu ulluinnarni sulinermi nutserutigisassavagut, taanna oqarpoq.

Tamannali Sermitsiaq.AG-p nutserisoqarunnaarneranik kinguneqarnavianngitsoq, taanna aamma erseqqissaavoq.

- Nutserisoqaannassaagut. Taakkorpiaalli allatut suleriaaseqalersussaassapput, ulapaarunnaamisussaassapput allakkavullu immaqa pitsaassusiginnerulertussaassallutik.

Nutserisutimmi nutserummik inaarsakkat ajunnginnersut misissuisarnissaat ajunnginnissaannik qularnaarisarnissaat pingaarpoq.

- Nutserutit (AI) atuleriarutsigit inaarsagaat ajunnginnersut misissortassavagut. Taakku nutaaliaagaluarlutik pisinnaasaat killeqarmata inaarsagaannik misissuisarnissarput pisariaqarpoq, Masaana Egede oqarpoq.

AI-T SUUPPAT?

Atortorissaarutit nutaaliat qarasaasiallit, AI (Artificiel Intelligens), inuttut isumaliortaaseqartuusaarsinnaasunik pissuseqartuusaarsinnaasunillu programmiliuussaammata, inuup suliassaraluanik suliaqarsinnaapput.

AI-t oqaatsiniit oqaatsinut nutserinermi atussatillugit, qarasaasiat oqaasilerissutit inerisarluakkat, qarasaasiap nukinginik atuiffioqisut, atorneqartarput. Taamaalillutik allakkat ilisarnaataannik ilisarinnilertarput, isumalimmillu nutsersinnaallugit.

Tassa atorneqarneruleriartortillutik pisinnaasaqarneruleriartorlutillu naammassisaqarneruleriartortarput.

AI-t sorpassuarni, soorlu biilini nammineq ingerlasartuni, internettikkut allakkasuaatinik akissusiortartuni nipilersukkanillu immiussinermi, atorneqartarput.

Allisiguk

Nutserisoqarfiit malinnaasut

Sermitsiaq.AG nutserutinik kisimi uitsatiginninngilaq. Soqutiginnillutimmi ilaatigut Sermitsiaq.AG-p ineriartortitsinialernera malinnaaffigigitsik, Namminersorlutik Oqartussat nutserisoqarfiani nutserisuuneq Ole Birch oqarpoq.

- Tassa siunissami atorsinnaanissaat massakkoqqissaaq isummerfigisinnaanngikkallarparput. Siunissami takutikkumaarpaa. Kisianni tassa soqutiginnilluta ilaatigut Sermitsiaq.AG-p ineriartortitsinialernera malinnaaffigaarput. Paasinarsippallu atorluarsinnaasoq atorsinnaanissaat soorunami isummerfigiumaarparput.

Nutserutinimmi atuinerup pitsaaqutitai, nutserisuunerup arajutsisimanngilai.

- Naammassisaqarluarnissamut iluaqutaasinnaasut qularnanngilaq. Qanorli atorluarsinnaatiginerat paaseriarutsigu isummerfigiumaarparput. . Kisianni oqaatigissallugu pingaaruteqarpoq, suliaat pitsaassusaat aallaaviulluinnartussaassapput, taanna oqarpoq.

Nunatsinni nutserisoqarfiit amerlanerpaataasa nutserissummik qangali atuereertut, Ole Birchip aamma erseqqissaatigaa.

Soorlu Namminersorlutik Oqartussat nutserisoqarfiata nutserissut TMS-imik atilik (Translation Memory System) ukiut qulit matuma siornatigulli atugaraa. TMS tassaavoq, nammineerluni nutsikkanik toqqorterisartoq taavalu nutseriikkavut atoqqiffeqqissaqaleraangata taakkuninnga nammineerluni saqqummersitsisartoq. Tassa nammineerluni nutsikkanik toqqortereriarluni atugassanngortitseqqilluni saqqummersitsisarmat nutserisut nutseriikkanik aallaqqaataaneerinnittariaqartanngillat.

Neqeroorutigisassagaa

Sermitsiaq.AG nutserutinik atuisuuliinnarnani taakkuninnga nunatsinni suliffeqarfinnut allanut aamma neqerooruteqartalilertoq, Masaana Egede oqarpoq.

- Inuaiqatigiinni amerlasuut kalaallisuumiit qallunaatuumut paarlattuanillu nutseriffiupput. Taakku neqerooruteqarfigilersaarpavut. Namminersortut pisortallu suliffeqarfiutaat tamatumani ikorfartorusullugillu ikiorusuppavut, taanna oqarpoq.

Allakkanik nutseruteqaannarnatik aammali allatut attaveqateqarnermut paasissutissarsiornermullu nutaalianik atortorissaaruteqalersaarlutik, Masaana Egedep ilanngullugu erseqqissaatigaa.

- Immaqa allakkanik atuaasaqartoqalerlutalu oqalunnermik allaganngortitsisinnaasoqalissagut, maani nunami nammineq oqaatsiminnik atuarnissamik periargfissaqanngitsut atorsinnaasaannik, taanna oqarpoq.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.