Tusaanngap saaffiginnittartut amerliartortut malugaa: - Kisimiinngilatit

Upernaleraangat qaamanerusaleraangallu aamma taarsiortoqalertarpoq. Ilisimatusartup imminut toquttutut nalunaarsorneqartut upernaakkut amerlanerusartut oqaatiginikuuaa. Tamannalu ulloq unnuarlu siunnersuisarfiup Tusaanngap aamma ilisarisinnaalluarpaa.

- Taanna sunniuteqartarpoq, malugisarparput. Soorlu ulapinnerulertarpugut aasaleraangat aamma ukialeraangat ukiup tungaanut taartalernera taanna sunniuteqartarpoq, aamma piareersimaffiginiartarparput, Isumaginninnermut Aqutsisoqarfimmi pisortaq Tusaanngamullu atassuteqartoq, Naja Lund Kielsen, oqarpoq.

Tusaanngap sapaatip akunnerata siuliani saaffiginnittut amerlisut maluginiarpaa, tamannalu pissutigalugu sianertut allattullu tamarmik erngertumik akineqarsinnaasimanatik.

Taamaakkaluartorli suli saaffiginnittoqartarnissaa kaammattuutigaat – akineqarnissamulli piffissaq sivisunerulaarsinnaasoq, Naja Lund Kielsen oqarpoq. Taassumalu oqarnera naapertorlugu saaffiginnittoqarneruneranut imminut toquttoqarnera inuiaqatigiinnut tamanut sunniuteqarneranik ilaatigut pissuteqarpoq.

- Nunatsinni imminut toquttoqarsimatillugu tamanna maluginiartarparput. Taakku illoqarfeqatigisaat imaluunniit atassuteqarfigisaat pingaartumik sunnerneqartartut, Naja Lund Kielsen oqarpoq, nangillunilu:

- Kisianni inuit imminut toqunnissamik eqqarsaateqartarsimareersut aamma sunnerneqartarput. Pisorlu nuna tamakkerlugu ukkatarineqaleraangat amerlanerusut uagutsinnut attaveqalertarnerat maluginiartarparput.

Ulloq unnuarlu ammasartoq kinaassutsimillu isertuussiffiusinnaasoq

Tusaannga 2023-mi februaarimili sapaatip akunnerani ullut tamaasa ulloq unnuarlu ammasalerpoq. Tassani inuit ajornartorsiutinik tamanik oqaloqateqarnissamik pisariaqartitsisut saaffissaqarnissaat pingaartinneqarpoq.

- Assigiinngillat, imminut toqunnissamut eqqarsaatillit taakku ilaapput, kisianni aamma ukua ilisimasagut, kiserliorneq. Amerlasoorujussuit kiserliornertik tunngavigalugu taanna sianertarput. Kisianni aamma tarnikkut naqisimaneqarneq. Sianertut sianeqqikkajuttartut aamma maluginiartarparput. Tusaaneqartutut misigisimanertik pissutigalugu sianeqqittarput, Naja Lund Kielsen oqarpoq.

Assi © : KNR

Taassuma oqarnera naapertorlugu Tusaanngamut attaveqarnermi kinaassutsimik isertuussisinnaaneq pingaaruteqarpoq.

- Kinaassutsimik isertuussineq taanna aamma isumaqartorujussoorpasittarami soorunami oqaloqateqarsinnaasoq ilisimaneqanngikkaluarluni kinaanerluni. Tassuunartaatigut qujanartumik tusaannga ilisimaneqarnera annertusinikooqisoq malugisarparput sianertoqartarnera atorneqarluartarluni tassuunartaatigut, taanna oqarpoq.

Amerlanerusut ilisimaleriartoraat

Tusaannga qaammammut 600-t missaannik attavigineqartarpoq, attaveqartartullu ukiuni kingullermi amerliartorlutik.

- Amerliartortungaatsiartut maluginiarparput. Amerlanerusut ilisimalerpaatigut, tamannalu periarfissaqartitsinerup iluaqutaaneranut takussutissatut isigaarput. Ulloq unnuarlu periarfissaqartitsinissaq anguniagaanikuuvoq, sunniuteqarluartorlu takusinnaavarput, taanna oqarpoq.

Naallu Tusaannga katsorsaaviunngikkaluartoq, Naja Lund Kielsenip tamanna tusarnaarneqarnissamut periarfissaqartitsinerusoq erseqqissaatigaa, sulisullu sunaluunniit pineqaraluaraangat sapinngisartik tamaat siunnersuiniartarput.

- Ikiorneqarnissamik pisariaqartitsigaanni sianertoqarsinnaajuaannarpoq. Kisimiinngilatit. Kiserliortutut misigiguit saaffissaqartuaannarpoq, taanna oqarpoq.