Tusaannga: Oqarasuaatikkut siunnersuisarfik iluatsilluartoq
Siunnersuisarfillu iluatsilluarsimavoq, Tusaanngami 498-eriarluni saaffigineqarsimavoq.
Oqarasuaatikkut siunnersuisarfiit assigiinngitsut suna sammisaanersoq apeqqutaatillugu siornatigut neqerooruteqartarput, Tusaanngali pilersinneqarneratigut tamakku normumut ataatsimut katersorneqarput, 80 11 80-imut sianertoqarsinnaalerluni, 1899-imullu SMS-ertoqarsinnaalerluni.
Tusaannga ullut tamaasa nal. 16.00-imiit 22-00 tungaanut ammasarpoq, attaveqarnerlu akeqarani kinaassutsimik isertuussisuulluni. Meeqqat, inuusuttut, inersimasullu tamarmik oqaloqateqarnissamik, allaqateqarnissamilluunniit pisariaqartitsisut Tusaannga attavigisinnaavaat. Ajornartorsiutit annikikkaluarunik annertuppataluunniit siunnersuisartut ikiuinissamut piareersimapput. Najoqqutarisaq: Peqqik.gl
AAMMA ATUARUK Ane kunne godt have brugt Tusaannga
Tusaannga innuttaasunut ajornartorsiutit pillugit oqaloqateqarnissamik pisariaqartitsisunut nalinginnaasumik attavigisartakkaminnit imaluunniit najukkaminni ikiorserneqarsinnaasutut misigisimanngitsunut neqeroorutaavoq.
Innuttaasut ajornartorsiutititik pillugit ikiorserneqarnissamik siunnersorneqarnissamillu sumut saaffiginninnissaminnut nalornisut tamatuma saniatigut Tusaanngamit innersuunneqarsinnaasarput.
Pingaartumik arnat niviarsiaqqallu oqarasuaammik siunnersuisarfimmik atuisartuusut, Tusaanngap atuutilerneranit killiffia pillugu misissuinerup takutippaa, soorlu aamma misissuinerup takutikkaa inuit saaffiginnittut amerlanerit Nuummeersuusut.
AAMMA ATUARUK Atuisussanut sulisussanullu pisariinnerussasoq
Inersimasut Tusaanngamut saaffiginnittarnerannut kiserliorneq pissutaanerpaavoq. Saaffiginnittarnernut pissutaasut tulliuttut nalinginnaanerpaat tassaapput angerlarsimaffimmi ajornartorsiuteqarnerit, qamuuna tarnikkut ajornartorsiornerit kiisalu imminut toqunnissamik eqqarsaateqarnerit.
Tusaanngamut saaffiginnittut 74 procentii ikiorneqarsimallutik isumaqarput, 87 procentillu isumaqarlutik oqaraasuaatikkut siunnersuisartut siunnersuisarnissaminnut pikkorissuullutik piareersimasut.
- Tusaanngamut saaffiginnittartut amerlanersaat ikiorneqarsimasutut misigisimasartut ilisimavarput, taamaattumillu oqarasuaatikkut siunnersuisarfiup ilisimaneqarnerata siaruarnissaanut siunnerfeqarluartumik sulinissarput pingaaruteqarpoq, Peqqissutsimut naalakkersuisoq martha Abelsen oqarpoq.
