VIDEO Tunumi arsaalluni 2020-mi pissartanngorniunnissaq piviusunngoratarsinnaavoq
![](/sites/default/files/styles/image_934x467/public/oembed_thumbnails/2022-12/0uAFgwvIwAHj19s_RYO_MJPwpWpCkQFbQOPTOj9PaGg.jpg?itok=cfWfFqgF)
Ukiut tallimat qaangiuppata Tasiilami isikkamik arsaalluni pissartanngorniunneq, GM 2020 piviusunngoratarsinnaavoq. Takorluukkammi piviusunngortinneqarnissaanut Tasiilami innuttaasut sulinissamut piareersimapput.
- Ilaanarujussuaq, maani tunumi timersoqatigiiffilerisartunik misilittagartoorpassuaqarpoq taavalu aamma nalunngilluinnarpara timersoqatigiiffiit ikioqatigiilluartartut taavalu qanimut suleqatigiissinnaasut, isumannanngittorujussuussoq isumaqatpunga tamanna, isikkamik arsaannermik soqutigisalik Tasiilamiit, Knud Mathiassen, KNR-imut oqarpoq.
Piviusunngortitsinissamulli piumasaqaatitaqarpoq.
- Tasiilami piumasaqaatit allatuulli aamma piumasaqaataasussaapput, tassa imaappoq inuit 160-niit 200-it tigusinnaasariaqassavaat, inissaqartillugit nerisaqarnerat soorunami aamma neriffissaat tamakkua assigiinngitsut piumasaqaataasussaapput, arsaaffiup pitsaassusaa aamma piumasaqaataasussaavoq soorunami, John Thorsen GBU-mi siulittaasoq KNR-imut oqarpoq.
- Soorunami tamakku piumasaqaatigineqartut kattuffimmiit qulakkeersinnaavagut aamma isumaqarpunga aamma kommunerput isumalluarumaartoq, Knud Mathiassen oqarpoq.
Kitaaniillu tunumut aammalu tunumiit kitaanut angallanneq matumani apeqqutaaqataassaaq.
- Angallannikkut pissutsit ullumikkuminngaanniit allanngorsimanngippata taava inuit 200-it tungaanut sapaatip akunnerata iluani katersornissai Tasiilami immaqa ajornakusoorsinnaassaaq, John Thorsen oqarpoq.
Taamaattorli ukiuni tallimani piareersarnikkut takorluukkap piviusunngortinneqarsinnaanera ammaffigineqarpoq.
- Tunumi aaqqissuisoqassagaluarpat taava piffissaq aamma taanna annerusumik qaangingaarnagu immaqa aaqqissuussineq aaqqinniarsarigaanni allatigullu orninissaa aaqqinniarsarigaanni, piviusunngoratarsinnaavoq, John Thorsen oqarpoq.