Tunumi aalisarnermik inuussutissarsiorneq nukittorsarneqartussanngortoq
- Pingaaruteqartorujussuuvoq nunatta kangiani Tunumi aamma inuussutissarsiutitigut inerisaanissaq. Nalunngilarput aalisarnikkut periarfissat arlalippassuit inerisarneqarnissamut piukkunnartut utaqqiinnartutut ittut. Inuit isumaqarluartumik inuuneqartikkusuppagut aammalu isumalimmik makillutik ullaakkut suliffissaannik pilersitseqataarusuppugut. Taamaammat nuannaartorujussuuvunga atsioqatigisinnaasimagakku Jens Immanuelsen.
Aalisarnermut ikaarsaarniarneq immikkut isiginiarneqartoq
Borgmester Asii Chemnitz Narup aamma oqarpoq Tasiilami piaartumik tunitsivimmik pilersitsisoqassasoq, aamma Kommuneqarfik Sermersuup piniartuunermit aalisartuunermut ikaarsaariarnerup qitiutinneqarnissaanut pikkorissartitsisoqartarnissaa isumagissagaa.
- Kommunimut pilersaarummut tapiliussaq piareerarparput. Nunaminertaq tunisassiorfiliarineqarsinnaasoq akuersissutigineqareerpoq. Taamatuttaaq aamma tunisassiorfiup sulisuisa inissaannik aamma nunaminertamik inniminneereernikuulluta. Kisiannili aalisarnermut ikaarsaariarnermi qaammarsaanerit, piginnaanngorsaanerit aammalu pikkorissaanerit, taakkua uagut akisussaaffigaagut, Kommuneqarfik Sermersuumi borgmesteri taama oqarpoq.
