'Tunuarnissannut piffissaq eqqortuuvoq'

2005-mili Nukissiorfiit pisortaa, Svend Hardenberg tupaallaataasumik ullumi atorfimminit tunuarpoq. Nukissiorfimmit paasissutissat naapertorlugit tunuarnissani nammineerluni kissaatigisimavaa.

- Piffissami sivisungaatsiartumi tunuarnissara eqqarsaatigaara, tassalu ullumi taamaaliornissara aalajangerlugu. Marsip arfineq-aappaanni Nukissiorfiit ukiumoortumik naatsorsuutaat Naalakkersuisunut tunniupparput, tamannalu iluatsillugu taakkununnga tunuarniuteqarnissara nalunaarutigalugu, Svend Hardenberg oqarpoq nangillunilu.

- Ukiut tallimat matuma siorna Nukissiorfinni atorfinikkama anguniagassat arlallit siunniussimavakka, maannalu oqarsinnaavunga kusanartumik angusaqarsimallunga, Hardenberg oqarpoq.

Pisortaanermi nalaani Nukissiuutinut Naalakkersuisorlu, Jens B. Frederiksen isumaqatigiiginnartarsimanngillat.

- Tunuarninnut tamanna pissutaanngilaq. Atorfittut ittumik atorfeqassagaanni politikkikkut sulisut qanimut suleqatigineqartariaqarput. Soorunami isumaqatigiiginnarneq ajorpugut, tamannali qaangerneqarsinnaavoq oqaloqatigiinnerit pitsaasut aqqutigalugit, aammalumi taamaaliortarluta. Nukissiuuteqarneq pitsaasoq angusimavarput, tamannalu nuannaarutiginerpaavara. Taamatut angusaqarnitsinnut Nukissiorfinni sulisut qutsatissaqarfigeqaakka, Hardenberg naggasiivoq.

Svend Hardenbergip atorfimminit tunuareernermini suna suliarilissanerlugu suli naluaa, ilaquttanili ilaginerulissagamigit nuannaarutigalugu.