Qujaukitsoq: Tunngaviusumik inatsit qaqugu taasissutigineqassanersoq Inatsisartut aalajangissavaat
![](/sites/default/files/styles/image_934x467/public/37f7ac29-3366-4c9a-9dc2-703c08eb253a.jpeg?itok=M8gUsBZz)
Tunngaviusumik inatsisissaq pillugu isumalioqatigiissitap Kalaallit Nunaata namminersortup tunngaviusumik inatsisissaa missingersuusiussagaa Naalakkersuisut aalajangerpaat.
Tamanna Inuit Ataqatigiinneersumut Aaja Chemnitz Larsenimut ernumalersitsivoq. Tunngaviusumik inatsisissatut missingersuusiaq innuttaasunit taasissutigineqarluni akuerineqarpat, namminiilivinnissamut sulineq aallartissasoq statsministerip Lars Løkke Rasmussenip siusinnerusukkut oqaatigaa.
Nunatta ukiualunnguit qaangiuppata qanoq namminiilivissinnaanissaanut pilersaaruteqarnani tunngaviusumik inatsisissatut siunnersuut akuerineqassappat Tuluit Nunaata EU-mit aniniarnermini ajornartorsiutaasa assigisaannik nunatsinni ajornartorsiuteqalernissarput Aaja Chemnitz Larsenip ernummatigaa.
Missingersuusiaq ukiut marluk qaangiuppata tunniunneqassasoq
Isumalioqatigiissitaq nunatta tunngaviusumik inatsisissaanut missingersuusiamik 2021-mi inuiattut ullorsiornitsinni tunniussereersimassaaq, Inatsisartunullu 2021-mi ukiakkut ataatsimiinnermi saqqummiunneqarnissaa pilersaarutaalluni.
Tunngaviusumilli inatsisissatut missingersuusiaq innuttaasunit qaqugu taasissutigineqassanersoq pillugu suli aalajangiisoqanngitsoq, aningaasaqarnermut naalakkersuisoq Vittus Qujaukitsoq allappoq.
AAMMA ATUARUK Doris J. Jensenip Tunngaviusumik inatsisissaq pillugu isumalioqatigiissitaq siuttuuffigissagaa
- Isumalioqatigiissitap sulinera naammassippat, suliap qanoq ingerlaqqinnissaa Inatsisartut aalajangigassarisussaavaat. Taamaammat inatsisartut tunngaviusumik inatsisissatut missingersuusiamut innuttaasunik taasititsinissaq qaqugu naleqquttuussanersoq aalajangigassaraat, Vittus Qujaukitsoq KNR-imut allappoq.
Taanna ilanngullugu allappoq, isumalioqatigiissitami sulinerup naammassinerata kingorna pilersaarutit pillugit erseqqissumik oqaaseqarnissaq maanna siusippallaartoq.
Siunnersuut atortussanngorpat pisoqaavallaalersimasinnaasoq
Aaja Chemnitz Larsenip sukkavallaamik ingerlanitsinnik ernumassuteqarnerani, tunngaviusumik inatsisinik ilisimasalik, Jens Wendel-Hansen tunngaviusumik inatsisissap atuutilertussanngornerani pisoqaavallaalersimasinnaassasoq oqarpoq.
Isumalioqatigiissitaq siunissami atorfissaqartitatut ullumi takorloorneqarsinnaasunut sapinngisamik naapertuuttumik tunngaviusumik inatsisissatut missingersuusiussasoq, Vittus Qujauktisoq allappoq.
AAMMA ATUARUK Danskit inatsisaat tunngaviusut avataasigut tunngaviusumik Inatsisiliornissaq periarfissaavoq – nutaangilisoorfiusinnaallunili
Qujaukitsulli erseqqissaatigaa, missingersuusiaq naleqqussartariaqarsinnaassasoq.
- Aamma una tunngaviusumik inatsit - akuersissutigineqassappat - piffissami aggersumi eqqarsartariaatsit atugarisallu naapertorlugit naleqqussarneqarneqarnissaminik atorfissaqartitsissaaq. Qaqugu tamanna pissanersoq kimilluunniit oqaatigineqarsinnaanngilaq. Unali qularnanngilaq, inatsisit inunnit suliarineqartut tamarmik naassaanngitsumik atuussinnaanngillat, Vittus Qujaukitsoq allappoq.
AAMMA ATUARUK Tunngaviusumik inatsit akisusinnaasoq