Oqaluttuarisaanermik ilisimatooq: Danskit inatsisaat tunngaviusut avataasigut tunngaviusumik Inatsisiliornissaq periarfissaavoq – nutaangilisoorfiusinnaallunili

Tunngaviusumik inatsisissatut missingiut danskit tunngaviusumik inatsisaannik aallaaveqanngitsoq, nunatta siunissami namminersulerluni qanoq isikkoqarumaarneranut qileruteqannginerulluni sinaakkusiisinnaavoq. Kisianni aamma tunngaviusumik inatsisissaq suli atorneqalertigani nutaanngilisoorsinnaasoq, oqaluttuarisaanermik ilisimatooq naliliivoq.
Tunngaviusumik Inatsisit pillugit Isumaqalioqatigiissitaq illoqarfinnut nunaqarfinnullu tamanut tikissaaq Kalaallit Nunaata tunngaviusumik inatsisissaata sunik imaqartariaqarneranut siunnersuutinik katersilluni. Tunngaviusumik inatsisit pillugit Isumalioqatigiissitamut suliakkiissummi taama allassimavoq. Assi © : KNR
Allattoq Helle Nørrelund Sørensen
apriilip 30-at 2019 12:55
Nutserisoq Per Rosing

Kalaallit Nunaata killeqarfii sumiissappat? Naalagaaffimmi Kalaallit Nunaanni kina innuttanngorsinnaava? Politikkikkut aaqqissuussaanikkut periaaserisarput inatsisiliortutut inatsisinillu atortitsisutut pissaanermik tigumminnittunik Inatsisartoqarneq Naalakkersuisoqarnerlu suli atuutiinnassappat?

Tassa tunngaviusumik inatsisit pillugit isumalioqatigiissitap apeqqutit akisassaasa ilaat tamakkuupput. Taamatullu sulinermi danskit tunngaviusumik inatsisaannut pituttorsimannginnissaq pingaartuuvoq, Jens Wendel- Hansen, siornatigut Ilisimatusarfimmi oqaluttuarisaanermi inuiaqatigiilerinermilu adjunktiusimasoq massakkullu Danmarkimi Syddansk Universitetimi post.doc.-iusoq oqarpoq:

- Oqallinnerup sinaakkuserneqannginnissaa pingaartumik iluaqutaassaaq, oqarpoq. 

AAMMA ATUARUK Nunatta namminiilivinnissaanut tunngaviusumik inatsisissamut missingersuusiortoqassaaq

Tunngaviusumik inatsisit pillugit isumalioqatigiissitaq danskit tunngaviusumik inatsisaannut pituttorsimanngitsumik Kalaallit Nunaata tunngaviusumik inatsisissaanut missingersuusiussasoq Naalakkersuisut upernaaq siusinnerusukkut nalunaarutigaat. Missingersuusiaq 2021-mi piareersimassaaq.

Kalaallit kinaassusaat suunersoq aamma siunissami Kalaallit Nunaata politikkikkut aaqqissuussaanera qanoq ittuussanersoq oqaasertalissagaanni sinaakkutit killilerneqanngitsut iluaqutaassapput. 

- Aaqqissuussaanerit suliarineqartussat - aqutseriaaseq, piginnaatitaaffiit assigisaallu - tunngaviusumik inatsisiliornermut atatillugu naalagaaffiup kinaassusaanik aallaaveqarnissaat pingaartorujussuuvoq. Danskit Tunngaviusumik Inatsisaat killiliisorissanngikkaanni tamakku pillugit oqallinneq pituttorsimannginnerujussuussaaq, Jens Wendel-Hansen oqarpoq.

Nutaanngilisoorsinnanera

Siusinnerusukkut pilersaarutaasimagaluarpoq, tassa Tunngaviusumik inatsisit pillugit Isumalioqatigiissitaq marlunnik missingersuusiussasoq: ataaseq danskit tunngaviusumik inatsisaannut pituttorsimasoq, aappaalu Kalaallit Nunaat naalagaaffinngorpat ulloq taanna atuutilersussaq. 

Aamma tunngaviusumik inatsisissamut siunnersuutip danskit tunngaviusumik inatsisaat ataqqinngippagu ajoqutaasinnaavoq. Tassami Kalaalit Nunaat naalagaaffeqatigiinnermut ilaatillugu tunngaviusumik inatsisit nutaat atorsinnaanngillat. 

- Taamaattumik tunngaviusumik inatsisip atuutitinneqalernermini nutaanngilisoorsimanissaa aarleqqutigineqarsinnaavoq, Jens Wendel-Hansen oqarpoq.

Savalimmiuni tunngaviusumik inatsimmut missingersuut ukiut qulit ingerlanerini suliarineqarpoq. Tassanili tunngaviusumik inatsisissamut missingersuut danskit tunngaviusumik inatsisaannut pituttorsimavoq.

AAMMA ATUARUK Siunnersuusiornermi Tunngaviusumik inatsit ataqqineqassanngitsoq

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk