Oqallinneq: Tunngaviusumik inatsisissaq Isummersorfimmi sammineqassaaq
Tunngaviusumik inatsisissamut siunnersuut ukiaq Inatsisartuni suliarineqapallappoq. Inuppassuit sapaatip akunnerani eqqissisimaarlutik sulinngiffeqaleruttornerisa nalaani isumalioqatigiissitaamik pilersitsinissamut suliassallu nassuiarnissaanut Inatsisartut Naalakkersuisunut piginnaatitsissummik tunniussipput.
Tunngaviusumik isumalioqatigiissitami ilaasortanngorlaat maanna sullisitik ateriarlugit ulappussinnaanngorput. Sulili siullermeertumik ataatsimiinngitsulluunniit Isumalioqatigiissitami siulittaasoq Vivian Motzfeldt, Namminiilivinnissamullu Naalakkersuisoq Suka K. Frederiksen isumaqatigiinngissuteqalerput. Tunngaviusumik isumalioqatigiissitaq qanoq sulissanersoq isumaqatigiinngissutaalluni.
AAMMA ATUARUK Tunngaviusumik inatsisissatut siunnersuut isumaqatigiinngissutaasoq
Tunngaviusumik inatsisissamut siunnersuut marloqiusamik immikkoortortaqassasoq Naalakkersuisut suliassiissutigaat. Tassa imaappoq danskit tunngaviusumik inatsisaata ataani atuuttussamik, nunattalu namminiilivinnerani atuutilersussamik tunngaviusumik inatsisissamut siunnersuusiortoqassasoq. Tamannalu akerlerineqarpoq.
Inatsisartuni inatsisinut ataatsimiisitaliaq isumaqarpoq nunarput namminiilivinniaruni tunngaviusumik inatsisissaq danskit tunngaviusumik inatsisaata ataaniissanngitsoq. Tamannalu naalakkersuisooqatigiit isumaqatigiissutaanni erseqqarissumik allassimagaluarpoq.
AAMMA ATUARUK Tunngaviusumik inatsisissamut isumalioqatigiissitaq ulapittussaassasoq
Isummersorfik unnugu nalunaaqutaq 20.00 toqqaannartumik TV-kkut aallakaatinneqassaaq. Suliassami suut unamminarnerpaassappat, ataatsimik marloqiusamilluunniit suliaqartoqarpat suut assigiinngissutaassappat, suut unammillernassappat, suut immikkut eqqumaffiginiagassaappat, taakkuupput apeqqutit ilaat immikkut ilisimasaliup akisinnaasai.
Demokraatineersoq Nivi Olsen, Inuit Ataqatigiinneersorlu Mimi Karlsen aamma pulaartorineqassapput.
Kalaallisut aallakaatitsineq naammassippat qallunaatut nal. 20.30 aallakaatinneqassaaq.