Tunngaviusumik inatsisissamut isumalioqatigiissitaq ulapittussaassasoq

Tunngaviusumik inatsisip immikkoortua siulleq danskit tunngaviusumik inatsisaata ataani atuuttussatut suliarineqassaaq, immikkoortuatalu tullia nunarput namminiilivippat atuutilertussasut suliaassalluni.

Taamaaliornerli tunngaviusumik inatsisiliornissamut unammillernarnerutitsissasoq, piffinni kingulliunerusumi oqaluttuarisaanermut Ilisimatusarfimmi adjunkti, Jens Wendel-Hansen isumaqarpoq.

- Kalaallit Nunaata tunngaviusumik inatsisissamut piumasai inatsisinillu atuutsitsinermut ministereqarfiup akuersissutigisinnaasai imminnut ungasissorujussuusinnaapput, Jens Wendel-Hansen oqarpoq.

Taanna Savalimmiuni misilittakkanut ilaatigut innersuussivoq.

Savalimmiormiut tunngaviusumik inatsisissatut siunnersuutaat danskit inatsisinut atuutsitsinermut ministereqarfiannit 2010-mi itigartinneqarpoq, danskit tunngaviusumik inatsisaannut naapertuutinngimmat.

Taamaattoqarnerani Savalimmiunut tunngaviusumik inatsisissatut siunnersuut ukiuni arfineq pingasuni suliarineqareerpoq.

Nunatsinnilu tunngaviusumik inatsisissamut isumalioqatigiissitaq assingusunik unammilligassaqassaaq.

Nunattami naalagaaffiup tunngaviusumik inatsisaa akuerereermagu, isumalioqatigiisitap naalagaaffeqatigiinnerup ataani tunngaviusumik inatsisiliornialeruni naalagaaffiup sinaakkusiussaata iluani taamaallaat sulissaaq, Wendel-Hansen erseqqissaavoq.

- Tassalu naalagaaffiup tunngaviusumik inatsisaa Kalaallit Nunaannit allanngortinneqarsinnaanngilaq. Naalagaaffimmullu ilaagallartilluni taamaaliortoqarsinnaanngilaq. Naalagaaffiup tunngaviusumik inatsisaanut allannguiumagaanni taava naalagaaffimmit aniniarluni aamma oqarneruvoq, Jens Wendel-Hansen oqarpoq.

Taannalu naapertorlugu nunatta tunngaviusumik inatsisissaata danskit tunngaviusumik inatsisaanik sinaakkuteqartinnissaa tupinnanngitsumik unammillernartuussaaq.

 - Tunngaviusumimmi inatsisiliornerup ilagaa nammineq inuiaassuseqarnermik imminilu pissutsinik aqutsisuunermik ersersitsinissaq, Jens Wendel-Hansen oqarpoq.

Imminilu pissutsit tamakkua inatsimmiissagunik, pissaanerup naalagaaffeqatigiinni sumi inissisimanissaanik apeqqusiisuummata, immini pissutsit inatsimmi apeqqutaaneri tunngaviusumik inatsimmut aporaasiinnaapput.