Tulukkat naajallu piniarneqarsinnaalilersut

Tulukkat naajallu eqqissisimatitaanerat ukiuni tallimani misileraaffiusumik atorunnaarsinneqassaaq, taamannali pitinnagu Namminersorlutik Oqartussat timmissat illersorneqarnissaannut piniarneqarsinnaanerannullu nalunaarut nutaaq tusarniutigaat.

- Nalunaarutip matuma atuutilersinneqarneraniit ukiuni tallimani misileraaffiusumi ukioq kaajallallugu tulugaq, naajarujussuaq aamma naajarluk piniarneqarsinnaapput, aalisarnermut piniarnermullu naalakkersuisoqarfik allappoq.

Piniaqqusaannginnerannik atorunnaarsitsiniarneq Anthon Frederiksenip Partii Naleqqameersup siorna upernaakkut ataatsimiinnermi aalajangiinissamut siunnersuutaanit aallaaveqarpoq.

AAMMA ATUARUK Partii Naleraq vil ophæve fredning af ravne og måger

Frederiksen naapertorlugu timmissat ajoqutaapput:

- Aalisakkanik panertitsiniaraanni naajat tulukkallu piffimmukartinniarnagit assersuilluaqqissaartoqartariaqartarpoq, Anthon Frederiksen siunnersuuteqarnermini ilaatigut taama tunngavilersuuteqarpoq.

Naalakkersuisut: Pitsaanerusumik eqqagassalerineq ajornartorsiummut aaqqiissutaasinnaavoq

Naalakkersuisut aalajangiinissamut siunnersuutip oqallisiginerani pitsaanerusumik eqqagassalerineq naajat tulukkallu ajoqutaanerisa ilaannut aaqqiissutaasinnaanera innersuussutigaat.

Naalakkersuisut Inatsisartut siunnersuummik itigartitsinissaat innersuussutigaat, taakkuli siunnersuut taperserpaat taamaammallu nalunaarut allannguuteqarfiuniarpoq.

Aalajangiiffissatut siunnersuut naapertorlugu teriniannissat eqqissisimatitaanerat ukiuni tallimani misiliutaasumik aamma atorunnaarsinneqassaaq.

- Teriannissat perlerortut kujataani savaateqarfinni uumasunut saassussisartut tusartualerpavut, Anthon Frederiksen siunnersuutip ilaani tamanna pillugu allappoq.

Ukiuni tallimani misiliummik piniarneqarsinnaareerpata misiliut naliliiffigineqassaaq.

Nalunaarut februaarip aqqaneq-aappaata tungaanut tusarniaassutigineqarpoq.