Tuluit Nunaat: Kalaallit Nunaanni nakkutilleeqataaniartut
Naalakkersuisut Danmarkillu USA-mut tunngatillugu ukiumi nutaami akerleriissuteqaqqilernermut atatillugu, Natomut ilaasortat nunatsinni ataavarnerusumik nakkutilliisussanik pilersitsinissaat qinnuigaat.
Nakkutilliisut Arctic Sentrymik taaguuteqarput.
Tamanna takornartaanngilaq, Natommi Rusland kabelinik immap naqqatigoortunik ukioq kingulleq aserorterinera qisuariarfigalugu, Baltic Sentry pilersippaa
Tuluit Nunaanni illersornissamut ministereqarfik Arctic Sentrymut peqataalerniarnertik tusagassiuutitigut maanna nalunaarutigaat.
Norgemi sakkutuut ukiuni pingasuni tulliuttuni 1000-iniit 2000-inut marloriaatinngortinneqassasut, ministereqarfiup tamanna ilutigalugu ilisimatitsissutigigaa.
Tuluit sakkutuut 1.500-t Norgep issittortaanut qaammatip tulliani aallartissavaat.
Sungiusarnissamut, nunatsinni sungiusarneqartunut assingusunut - Arctic Light aamma Operation Arctic Endurance-mik taaguutilinnut, maanna ingerlanneqartunut - atatillugu taamaaliussapput.
Kalaallit Nunaanni nakkutilliineq
Danskit illersornissamut ministeriat, Troels Lund Poulsen nunanut allanut naalakkersuisup, Vivian Motzfeldtip USA-mi præsidentip tullersortaanik qaammatip siuliani ataatsimeeqateqarnerata nalaani tusagassiortunik katersortitsivoq.
Taassuma Vivian Motzfeldtip aamma illersornissamut pisortap Natomi iligisat sakkutuut Kalaallit Nunaanni najuunnerannik 'ataavarnerulersitsinissaq' pillugu piffissami aggersumi oqaloqatigissagaat tassani paasissutissiissutigaa.
BBC-p ilanngutassiaa naapertorlugu Natomi nunat illersornissamut ministerii Bruxellesimi sapaatip akunnerani matumani sisamanngornermi ataatsimiissapput.
Natop Arctic Sentry sungiusarneq nakkutilliinerlu aqqutigalugu Issittumi sillimaniarnermut pitsanngorsaanissaq pilersikkaa ullumi saqqummiunneqarpoq.
Amerikamiunit tapersiisoqarneratigut tamanna pilersinneqarpoq.
Norgemi Tunumilu issittumi sakkutuut
Tuluit Nunaata Norgemi sakkutooqatigiit Joint Expeditionary Forcesimik - tassa sakkutuut ataatsimoorlutik aallartitat siuttuuffigai.
Tassa Danmarkimit, Estlandimit, Finlandimit, Islandimit, Letlandimit, Lithaunimit, Hollandimit, Norgemit, Sverigemit Tuluit Nunaanniillu sakkutuut tassunga ilaapput.
Sakkutuut ataatsimut aallartitaasut saassussinermi aserorterinermilu attaveqaasersuutinik illersuinermik ukiup ingerlanerani sungiusassapput. Taakkulu silaannakkut, imaatigut nunamilu najuutissallutik.
Tamanna sungiusarnermut, Lion Protecter-imut - aammali Norgep nammineq sungiusarneranut, Cold Responsimut sakkutuut 25.000-it Norgep saassunneqarnissaanut illersuinermik sungiusartunut attuumassuteqarpoq.
Norgep issittortaani kisimi sungiusartoqassanngilaq, aammali Islandimi Danmarks Strædemilu Islandip Kalaallit Nunaatalu akornanniittumi.
