Nato Issittumi nutaamik suliaqarnissamik pilersaarusiorpoq.

Natop oqaaseqartartua Martin O’Donnell AFP naapertorlugu marlunngornermi taama oqarpoq.

- Natop nakkutilliinerulernissaanik pilersaarutit, "Arctic Sentry"-mik taaneqartut, aallartinneqarput, oqaaseqartartoq oqarpoq.

Danskit illersornissamut ministeriata Troels Lund Poulsenip (V) X-imi ikkussamini nalunaarut tamanna nuannaarutigaa.

- Natop suliniutaanut "Arctic Sentry"-mut tunngassuteqartut sakkutooqarnikkut pilersaarusiorneqalernerata Natop maanna uppernarsaanera nuannaarutigeqaara. Danmarkip Kalaallit Nunaatalu Natop Kalaallit Nunaanni eqqaanilu sakkutooqarnerulernissaa sulissutigisimavaat.

- Issittumi Atlantikullu avannaani isumannaallisaanerup annerulernissaa anguniarlugu Natomi suleqativut peqatigalugit ataatsimoorluta iliuuseqarnissarput pingaaruteqarpoq, Troels Lund Poulsen (talerperleq) allappoq.

Natop Kalaallit Nunaanni Issittumilu ataavartumik najuunnissaanik Danmark kissaateqartoq, Troels Lund Poulsenip ministeriunerullu Mette Frederiksenip (S) oqaatigaat.

Naalakkersuisut siulittaasuat Jens-Frederik Nielsen (D) aamma taama kissaateqarpoq.

Sakkutooqarnerulissasoq

Kalaallit Nunaannut tunngatillugu maannakkut marloqiusamik pisoqartoq, Mette Frederiksenip aamma oqaatigaa.

Ilaatigut Natomut Issittumilu sakkutuut amerlineqarnerinut tunngatillugu, aamma Danmarkip Kalaallit Nunaatalu USA-mik isumaqatiginninniarneranut tunngatillugu.

USA-p præsidentiata Donald Trumpip Kalaallit Nunaata USA-mit tiguarneqarnissaa pillugu kimigiisernerata kingorna Kalaallit Nunaat Issittumilu isumannaallisaanissaq sammineqangaalerput.

Troels Lund Poulsen Sverigemi marlunngornermi Göteborgimiippoq, tassanilu danskit svenskillu Ukrainemut tunissutaat saqqummiuppai, tassanilu aamma Natop suliaa eqqartorpaa.

- Amerikamiut aamma "Arctic Sentry"-mut peqataanissaat neriuutigaara, nutaarsiassaqartitsiviup TT-ip allaaserisaa naapertorlugu illersornissamut ministeri oqarpoq.

Sverigep illersornissamut ministeria, Pål Jonsson, oqarpoq "Sverige soorunami ikiuukkumaartoq".

Kalaallit Nunaata eqqaani sakkutooqarnikkut sapaatip-akunnerini kingullerni sungiusarnerit danskinit aqunneqartut ingerlanneqarput.

Taanna ateqarpoq "Arctic Endurance", sakkutuullu Natomut ilaasortat nunanit assigiinngitsuneersut peqataapput.

Sakkutuut sungiusarnernut atatillugu Kalaallit Nunaanniinnerujartornerat 2026-p sinnerani ingerlaannassaaq.

/ritzau/