Tuluit Nunaat EU-mit anisussanngorpoq
Tuluit Nunaanni taasisut 51,9 procentii EU-mit aniniarlutik taasipput, nutaarsiassaqartitsivik AFP naapertorlugu innuttaasunik taasititsineq taama inerneqarpoq.
EU-miiginnarusullutik taasisut 48,11 procentiupput.
Tuluit ukiuni 43-ni EU-mut ilaasortaanerat taamaalilluni oqaluttuaannanngortussanngorpoq. Danmark Tuluit Nunaat Irlandilu peqatigalugit 1973-imi EU-mut ilaasortanngorpoq.
EU-mit anerusuttut ajugaanerat premierminister David Cameronimut ajorsarujussuarneruvoq, tuluimmi EU-miiginnarnissaat taassuma politikkikkut ilungersuutigisimagaluarpaa.
Tuluit avissaarniaqatigiit partiiata (Ukip) siuttuata Nigel Faragep, innuttaasunik taasititsinermi ajugaasup, Cameron erngertumik tunuaqquaa.
- EU-mit aninissamik anguniagalinnik naalakkersuisoqartariaqarpugut. Politikkikkut peqatigiinneq iluatsissimanngitsoq maanna qimattussanngorparput, ajugaasimaarluni oqarpoq.
Europap kangiamiut EU-mi nunasiniartut unitsinneqarnissaat Ukipip qineqqusaarutigaa.
Innuttaasunik taasititsinerup inernerata kingunerisaanik Cameronip partiia konservativiusoq avissaartuuffiungaatsialerpoq. EU-mit aninissamik kissaateqartut, Boris Johnsonip siuttuuffigisai, Tuluit Nunaata qanoq alloriaqqinnissaa nangaassutigaat. Aninissap piviusunngortinnissaanut utaqqeqqaartoqassanersoq - immaqalu sivisuumik utaqqeqqaarneqassanersoq.
Partiip illuatungiliuttuusup Labourip siuttuata Jeremy Corbynip oqaatigaa Lissabonimi isumaqatigiissummi immikkoortoq 50 naalakkersuisut erngertumik aallartittariaqaraat, tassalu EU-mut ilaasortaanerup atorunnaarsinnissaa. Corbynip Labourillu Tuluit Nunaata EU-miiginnarnissaa sulissutigigaluarpaat.
- Ulloq juunip 23-iat kiffaanngissuseqalerfitsitut eqqaamaneqarli, Farage oqarpoq.
/ritzau/