Tuluit Nunaanni prins Philip toqusoq

Tuluit Nunaanni prins Philip toquvoq.

Tuluit Nunaanni kunngikkormiut nittartakkaminni tallimanngornermi taama ilisimatitsipput.

Dronning Elizabethip uia prins Philip 99-inik ukioqarluni illussaarsuarmi Windsor Castlemi eqqissilluni toqusimasoq, tuluit kunngikkormiui ilisimatitsipput.

Prins Philip napparsimmavimmi februaarip qiteqqunneranit marsip qiteqqunneranut uninngavoq. Marsip ulluisa 16-iani angerlartitaavoq, uummallunninilu pissutigalugu tamanna sioqqullugu ilaatigut aamma pilatsippoq.

Prins Philips Edinburghimi hertugiullunilu danskinit kingoqqisuusoq kunngip Christian qulingiluuata ernutaqqiutigaa.

1921-imi juunip ulluisa qulinganni inunngorami Danmarkimi Grækenlandimilu prinsinngortoq dronning Margrethe assigalugu kinguariit kunngikkormiunik glücksborgskikkunnik siuaasaqartunut ilaavoq.

AAMMA ATUARUK Tuluit kunngikkormiui: Harry Meghanilu asaneqartuaannassapput

Prins Philip sakkutuut illussaarsuarmi Windsor Castlemi siorna juulip qaammataani nalliuttorsiorneranni pisortatigoortumik kingullermik sulivoq.

Prins Philip dronning Elizabethilu corona pillugu ukiumi kingullermi killilersuisoqarnerani kunngikkormiut Londonip kitaani illussaarsuaanniipput.

Sisamanik qitornaqarput. Angajullersaat 72-inik ukiulik, prins Charles, tuluit kunngissaraat.

Prins Philip napparsimmavimmi februaarimi marsimilu uninngavoq, ernutaalu prins Harry nulialu Meghan taamanikkut apeqqarissaarfigineqaqattaarput.

Prins Harry nulialu Meghan Tuluit Nunaanni kunngikkormiunit arlalitsigut isorisaminnit tunuarput.

Prins Philipimik ilisinissaq pillugu qanittukkut nalunaaruteqarumaarlutik, tuluit kunngikkormiui tallimanngornermi ilisimatitsipput.