Tuluit Nunaanni orpiit ilisimaneqarnerpaat ilaat uppisinneqartoq - inuusuttuaraq tigusaasoq
Tuluit Nunaanni orpiit ilisimaneqarnerpaat eriagineqarnerpaallu ilaat uppisinneqarsimavoq.
Tuluit nutaarsiassaqartitsiviat Reuters taama allaaserisaqarpoq.
Piaaraluni serlersaarisoqarsimanera politiit pasitsaappaat, suliamullu atatillugu nukappiaraq 16-inik ukiulik tigusaralugu.
Orpik uppisinneqartoq Sycamora Gapimik taaguuteqarpoq, Tuluillu Nunaata avannarpasissuaniilluni. Orpik ukiut 200-t sinnerlugit pisoqaassuseqarpoq, pilattuullu motoorilik pingasunngornerup sisamanngornerullu akornanni unnuakkut uppisitsinermi atorneqarsimagunarluni.
Orpik Sycamore Gap filmimi "Robin Hood: Den Fredløse"-mi Kevin Costnerimik pingaarnertut inuttaaffigineqartumi takuneqarsinnaavoq.
Politiit nunap immikkoortuani pisortaata Kevin Waringip orpik nunarsuarmi ilisarnaatilittut taavaa. Tuluit tv-qarfiat BBC taama allappoq.
Orpiup uppisinneqarnera nunap immikkoortuani tassani, nunallumi aamma sinnerani quarsaarutigineqarlunilu alisuutigineqarpoq, innuttaasullu aamma kamaqalutik. Politiit pisortaat ilanngullugu taama oqarpoq.
