Trumpip Danmarkimut aallartitarisimasaa USA-p senatianut qinigaanngitsoq
USA-p præsidenterisimasaata Donald Trumpip Danmarkimut aallartitaa Carla Sands, USA-mi inatsisartut aappaannut senatimut qinersinissamut sassartussarsiornermi naalagaaffimmi Pennsylvaniami ippassaq qinersisoqarmat unammillertiminut naleqqiullugu qinersiseqarpallaanngilaq.
Carla Sands Republikanerit sinnerlugit sassarpoq.
Carla Sands 5,7 procentinit taaguunneqartoq, qinersinerit 99 procentiisa kisinneqareerneranni paasinarsivoq. USA-mi nutaarsiassaqartitsiviup NPR-ip kisitsisaataasa tamanna takutippaa.
AAMMA ATUARUK Carla Sands: Trumpip Kalaallit Nunaannik pisinialersaarnera isumassarsiatsialaavoq
Carla Sands, qullersarisimasami Donald Trumpip Kalaallit Nunaannik 2019-imi pisiumaneranut isuma qanoq igineraa qineqqusaarnerup nalaani apeqqarissaarnermi ilaatigut aperineqarpoq.
- Trump præsidentiusimasut akornanni taama siunnersuuteqartut pingajoraat, taava eqqarsarpunga: Isumassarsiatsialak. Trump angutaavoq isumaqatigiissusiorsinnaasoq.
- Danmarkilu Kalaallit Nunaata ineriartortinnissaanut illersornissaanullu akissaqanngitsoq maanna aamma ilisimavarput, Carla Sands oqarpoq.
Qinigaaffiup qiterpaarnerani senatimut ukioq manna novembarimi qinersisoqalerpat Pennsylvania pingaaruteqarsinnaavoq, kikkummi senatimi amerlanerussuteqassanersut kingorna paasinarsissaaq. Demokratimmi ataatsimik tassani amerlanerussuteqaqqalaarput.