Carla Sands: Trumpip Kalaallit Nunaannik pisinialersaarnera isumassarsiatsialaavoq
USA-p Danmarkimi aallartitarisimasaa Carla Sands isumaqarpoq Danmarkip Kalaallit Nunaata ineriartornissaanut illersornissaanullu akissaqanngitsoq.
Sands tv-kkut Newsmax TV-kkut aallakaatinneqartukkut oqallitsitsisoqarnerani taama oqarpoq.
Carla Sands, USA-mi naalagaaffiup Pennsylvaniap senatianut qaammatip massuma ingerlanerani qinersinissamut maanna qineqqusaaleruttorpoq.
Qullersarisimasami Donald Trumpip Kalaallit Nunaannik 2019-imi pisiniarneranut isuma qanoq igineraa apeqqarissaarnermi aperineqarpoq.
- Trump præsidentiusimasut akornanni taama siunnersuuteqartut pingajoraat, taava eqqarsarpunga: Isumassarsiatsialak. Trump angutaavoq isumaqatigiissusiorsinnaasoq.
- Danmarkilu Kalaallit Nunaata ineriartortinnissaanut illersornissaanullu akissaqanngitsoq maanna aamma ilisimavarput, Carla Sands oqarpoq.
AAMMA ATUARUK Carla Sands inatsimmik unioqqutitsisimasorineqartoq
Donald Trumpip Kalaallit Nunaannik pisinialersaarnera ministeriunerup Mette Frederiksenip tusaramiuk isumaqanngilluinnartutut taamanikkut taavaa. Ministeriunerup taama qisuariaateqarnera pissutaalluni Trumpip Danmarkimut tikeraarnissani taamaatiinnarpaa.
Carla Sands, USA-p Danmarkimut aallartitaatut 2017-imi decembarimi atorfinippoq. Aallartitatullu atorfik taanna 2021-mi januaarimi qimallugu.
AAMMA ATUARUK Trumpip Nunatta tunineqarnissaata itigartitsissutigineqareerneratigut tikeraarnissani kinguartikkaa