Trumpip Vestager appisaluukkaa: USA-mik qinngarinnittuuvoq
USA-p præsidentiata Donald Trumpip Fox Newsimit apersorneqarluni EU-p unammilleqatigiinnermut kommissæria Margrethe Vestager appisaluuppaa.
Financial Times taama allaaserisaqarpoq.
Vestagerip EU-llu Amerikamiut it-mik suliffeqarfissuinik Googletut Facebookkitullu ittunik suliassanngortitsisimanerat isornartorsiorpaa.
- Naapitanni USA-mik qinngarinnittut annersarigunarpaat, Donald Trump Fox Businessimut taama oqarpoq.
- Nunatsinnut iliuuserisai. Suliffeqarfiutivut tamaasa eqqartuussivilersuuppai. Googlemik Facebookkimillu eqqartuussivilersuusseqquneqarpugut.
Margrethe Vestager unammilleqatigiinnermut kommissæriunermini Amerikamiut ingerlatseqatigiiffiinnut milliarderpassuarnik aningaasartalinnik akiligassiisimavoq.
Ilaatigut Google akiligassinneqarpoq, EU naapertorlugu internettikkut pilerisaarutinik niuerfimmi sallersatut inissisimanerminik atornerluisimanini pissutigalugu.
Margrethe Vestagerip Google 1,49 milliardit euronik - 11 milliardit koruuninik - akiligassippaa.
Google EU-mit siornatigut katillugit 6,7 milliardit euronik akiligassinneqarsimavoq. 50 milliardit koruuninik.
Amerikamiut ingerlatseqatigiiffiinik suliassanngortitsinerit allat ilagaat Applep Irlandimi akileraartarnikkut inerteqqutaasumik ilaqutissartaqartinneqarsimaneranut 2016-imi 13 milliardit euronik akileraarutitigut akiligassinneqarnera (97 milliardit koruunit).
Donald Trumpip Fox Businessimi taama nalunaaruteqarnermigut USA-p nammineerluni Twitterimik eqqartuussivilersuussisinnaanera Donald Trumipip tikkuarpaa.
Donald Trump naapertorlugu inuit attaveqaqatigiittarfiata naapertuilluanngitsuliorluni præsidentimik malittarinnittut amerlassusaat killilersimavai.
Trump præsidentini siullersaalluni Margrethe Vestagerip Amerikamiut suliffeqarfiinut sakkortuumik iliuuserisartagaanik qularnartitsisuunngilaq.
2015-imimi præsidentiusup Barack Obamap EU-p Applemut, Googlemut Amazonimullu iliuuserisai "niuernikkut soqutigisanik tunngaveqarnerarpai".
Donald Trumpilli sakkortuumik oqaaseqarnerata EU killinngitsoorpaa, Financial Timesimi naapertorlugu isornartorsiuineq tunngavissaqanngitsoq EU-mit oqaatigineqarmat.
/ritzau/
