Trumpip ministerissamisut piukkussaa tunuartoq
Ministerissatut akuersissutigineqarnissaanut atatillugu Senatimi ullumi sisamanngornermi tusarniaasoqarnissaa sioqqullugu Puzder ministerissatut tunuarniuteqarpoq.
Ministerissatut sassartumut Republikanerit akornanni tapersersuisut ikiliartornerat ilutigalugu Andrew Puzder tunarniuteqarpoq.
Puzder ministeritut akuersissutigineqassappat senatimi 50-init tapersersorteqartariaqarpoq. Republikanerit senatimi 52-inik maanna ilaasortaatitaqarput, tv-qarfiulli CNN-ip paasisai naapertorlugit taakkunannga sisamat Puzderimik tapersersuiniannginnertik nalunaarutigereerpaat.
Puzderip suliffissaqartitsinermut ministerissatut piukkunneqarnera, demokratit senatimiittut arlallit isornartorsioreerpaat. Puzderimmi akunnermusiallit akissarsiaasa minnerpaaffissaasa 15 dollarinut qaffananneqarnissaannut siunnersuut apeqqusermagu demokratinit iluarineqanngilaq.
Puzderip taassuma saniatigut angerlarsimaffimmini ikiortissamik inatsisinik unioqqutitsinikkut USA-miittumik sulisoqarsimanera aamma paasineqarpoq.
Puzderimut tunngatillugu suliaq, Trumpip naalakkersuisussamisut piukkussaanut sulianut allanut ilaaginnarpoq. Trumpip USA-mi isumannaallisaaniarnermut tunngasunut siunnersortissamisut piukkussaa Michael Flynn siunnersortissatut atorfeqalersinnaanissaminit ataasinngormat tunuarpoq, Donald Trumpip Ruslandip USA-mut aallartitaanik oqaloqateqarsimaneranut tunngasunik eqqunngitsunik oqalussimanini pillugu tunuarluni.
/ritzau/
