Trumpip siunnersuutaa nutaaq Senatimi itigartitsissutigineqartoq
Siunnersuut siulleq præsidentip Donald Trumpip siunnersuutigaa.
Siunnersuut akuerineqarsimasuuppat naalagaaffiup suliffeqarfiutaasa ilaat matoqqatinneqarunnaassagaluarput.
Republikanerilli demokratillu isumaqatigiinnngittuarsinnarput, USA-mmi Mexicollu akornanni qarmarsualiornissamut 5,7 milliardit dollarinik, tassa 37,5 millardit koruunit missaannik, akeqartussamut missingersuutini aningaasaliisoqarnissaa, Donald Trumpip piumasaraa.
Demokratilli tassunga tapersersuinianngilluinnarput, præsidentillu siunnersuutaa amerlanerussuteqartunit itigartitsissutigineqarluni.
Siunnersuutit aappaat kingorna ilimagineqareersutut aamma itigartitsissutigineqarpoq.
Naalagaaffiup suliffeqarfiisa ammarneqarallarnissaat demokratit siunnersuutigaat, isumaqatiginninniartoqarnerata nalaani ammatinneqarnissaat siunnersuutigineqarluni.
Naalagaaffiup suliffeqarfiisa ilaat ulluni 34-ni maanna matoqqatinneqareerput, sulisut 800.000-it missaat akissarsiaqarsimanatik.
Trumpilli siunnersuutaa senatimi amerlanerussuteqartunit tapersersorneqaraluarpalluunniit assersuutigalugu qarmarsualiortoqarnissaa qulakkeerneqarsimanavianngikkaluarpoq.
Siunnersuummi Innuttaasut sinnerlugit sinniisoqarfimmi, tassa Repræsentanternes Husimi aamma akuersissutigineqaqqaarsimasussaavoq. Demokratit tamaani amerlanerussuteqarput, missingersuutissatullu siunnersuut siunnersuut itigartissimassagaluarlugu.
