Trumpip qineqqusaarnini aallarnerlugu tusagassiuutit appisaluukkai

USA-p præsidentiata Donald Trumpip 2020-mi præsidentimut qinersinissamut qineqqusaarnini pingasunngormat pisortatigoortumik aallartippaa.

Tamanna Floridap ilaani Orlandomi qinersisartunik ataatsimiititsinermi inunnit 20.000-init najuuffigineqartumi pivoq.

Præsidentillu tusagassiorfiit najuuttut appisaluuppai oqarluni taakku salluliorlutik allaaserinninnissamut piareeqqasut.

- Tusagassiuutinit fake newsiliorfiusuneersorpassuit ikani issiapput, Trump oqarpoq, inersuarmilu tusagassiorfiit inissisimaffigisaannut tikkuarluni.

Najuuttorpassuillu nipituumik avaalaartarput suaartarlutik "CNN sucks".

Trumpip aamma oqaatigaa 2016-imi præsidentimut qinersineq USA-p oqaluttuarisaanerani "pingaaruteqarluinnartuusoq" nunallu aningaasaqarnera aatsaat taama pitsaatigisoq.

- Politikkikkut peqquserluttuliornermik akiuiniarluta naalakkersuisut inuiaat soqutigisaat tunngavigalugit inuiaallu peqatigalugit aaqqissuuteqqippagut, Donald Trump oqarpoq.

Tamannali eqqortuunngitsoq, aviisit The Guardian aamma The Washington Post erseqqissaateqarput. The Washington Postimmi ukiaq allaaseraa inuit isumaqatissarsiornermik suliaqarsimasut 350-init amerlanerusut Trumpip allaffeqarfissuani maanna sulisuusut imaluunniit ukiut kingulliit marluk iluanni tassani sulisuusimasut.

Trumpip oqaatigisaa alla aviisinit aamma isumaqatigineqanngilaq, tassalu USA-mi suliffissaaleqisut maannakkorpiaq aatsaat taama ikitsigisut.

Suliffissaleqisut 3,6 procentiupput, tamannalumi aamma appasilluni, 1953-imili suliffissaaleqisut 2,5 procentiupput, aamma 1968-imi ullumikkumit ikinnerupput 3,4 procentiugamik.

The Guardian taama allaaserisaqarpoq.

Aviisi inuussutissarsiorneq pillugu allaaserinnittartoq The Wall Street Journal naapertorlugu Trumpip sulisuisa Orlandomi aaqqissuussineq sapaatit akunneri arfinillit sinnerlugit piareersaateqarfigisimavaat.

Trumpip nulia qitornaalu angajulliit najuupput, taamatuttaarlu præsidentip tullia Mike Pence nulialu.

Trumpip 2016-imi qineqqusaarnini aallarneramiuk "Make America Great Again" (Maga) oqaasinnaatut saqqummiuppaa.

Teqqiallillu aappalaatut taama oqaasertallit taarserneqartussanngorpasipput.

Præsidentimmi qineqqusaarnermini oqaasinnaani "Keep America Great"-inngortissanerlugu maanna isumaliutigaa.

/ritzau/