Trumpip NATO-mi iligiit isornartorsiorai

Altinget taama allaaserisaqarpoq. 

Præsident Trumpip NATO-mi nunat assigiinngitsut naalagaaffimmi tunisaasa ataatsimut nalinginit 2 procentimik illersornissamut akiliisannginnerat arlaleriarluni isornartorsiortareerpai.

Danmark isornartorsiorneqartunut ilaavoq. Taamaammat amerikamiut præsidentiat danskit ministeriuneranut allagaqarpoq. Danmarkip NATO-mi suliassani akuusarnera Trumpip allakkamini nersualaarutigaa, Sakkutooqarnermilu atortussanik Danmarkip USA-mit pisisarnera qujassutigalugu.

AAMMA ATUARUK Forsvarsforlig giver medansvar til Grønland

Danmarkili sakkutooqarnikkut illersornissamut aningaasanik atuinikinnerarlugu aamma isornartorsiuivoq.

Danmarkimi Folketingimi amerlanerussuteqartut illersornissamut nutaamik januaarip qaammataani isumaqatigiissuteqarput. Isumaqatigiissummi naalagaaffiup Illersornissamut aningaasartuutai 1,17 procentimiit 1,3 procentimut qaffannissaat akuerineqarluni. Tamannali BNP-ip 2 procentianit suli annikinneruvoq.

Lars Løkke Rasmussenillu Trumpip isornartorsiuinera illuatungilerpaa.

- Allakkami naalagaaffiup tunisaasa ataatsimut nalinginit sakkutooqarnermut aningaasartuutissat procentii illuinnaasiortumik sammineqarput. Danmark nunarsuarmut tamanut sanilliullugu, minnerunngitsumik aamma NATO-mi akisussaaffimmik tigummiaqarluarpoq (...) Nunarsuatsinni pisoqarfiusuni sassartarpugut eqqissineqarnissaatalu qulakkeernissaanut tapersiisarluta, ministeriuneq Altingetimut oqarpoq.

NATO-p Bruxellesimi juulip aqqarnani ataatsimiinnginnerani Trump taama allagaqarpoq.