Trumpip Iranimut atomi pillugu isumaqatigiissummit USA peqataajunnaarsikkaa

- Isumaqatigiissusiortoqartussaanngikkaluarpoq. Eqqissisitsinngilaq, aamma taamaaliorunanngilaq, Donald Trump ilaatigut oqarpoq.

- USA-p Iranip atomip nukinganik atuisinnaanissaanut isumaqatigiissummit aninera ullumi nalunaarutigaara, Trump oqarpoq.

Nunat Iranimik tapersersuisut immikkut ittumik sukannersumillu aamma iliuuseqarfigineqarsinnaasut præsidentip ilanngullugu oqaatigaa.

Isumaqatigiissut 2015-imi atsioqatigiissutigineqarpoq. Iranip atomimik qaartartorsualiorsinnaannginnissaa isumaqatigiissummi qitiuvoq, atomilli nukinganik nalinginnaasumik atuisinnaanissaa anguniagaalluni. Nunat tamalaat Iranimut immikkut ittumik sukannersumillu iliuuserisaasa atorunnaarsinneqarnissaat aamma siunertaavoq.

Trumpip USA isumaqatigiissummit peqataajunnaarsippaa naak assersuutigalugu Europami nunani assigiinngitsuni naalakkersuinikkut siuttut oqaatigigaluaraat USA isumaqatigiissummut ilaaginnartariaqaraluartoq.