Trumpip Greta Thunberg naapikkusuvissorsimagaluaraa

Silap pissusiata allanngoriartornerata akiorniarneqarnissaanut sukataaruteqartup, Greta Thunbergip, Sverigemeersup, Schweizimi Davosimi ataatsimiittoqarnerani naapinnissaa kissaatigisimagaluarlugu, USA-p præsidentia Donald Trump oqarpoq.

- Naapikkusuvissoraluarpara. USA-li silap pissusiata allanngoriartorneranut pissutaanngilaq, naak oqaraluartoq nunat assigiinngitsut silap pissusiata allanngoriartorneranut naammattumik iliuuseqanngippallaartoq, Trump oqarpoq nangillunilu:

- Nunat allat USA-mit mingutsitsinerupput. Gretap nunat taakku samminerusariaqaraluarpai, Trump Washingtonimut utinnginnermini tusagassiortunik ullumi pingasunngornermi katersortitsinermi taama oqarpoq.

Nunat suliffissuaqarfiusut assigiinngitsut Schweizimi Davosimi ukiumoortumik ataatsimiittarput, Trumpilu tamanna pillugu Davosimiilluni.

AAMMA ATUARUK Donald Trumpip Greta Thunberg avoqqaaraa

17-inillu ukiullip, Greta Thunbergip, atuagassiamit Time Magazinemit Trump qaangerlugu malunnaateqarnerpaasutut siorna 2019-imi toqqarneqarnera, Trumpip nammineq oqaaseqarfigaa.

Thunbergip silap pissusiata allanngoriartornerata akiorniarneqarnissaa pillugu sukataaruteqarnera Timep taamaasilluni nersorniarpaa, Thunbergilu Davosimi ataatsimiittoqarnerani oqalugiartunut aappassaa peqataalluni.

Silap pissusiata allannngoriartornerata inunnit pilersinneqarsimaneranik immikkut ilisimasallit oqarnerat ilumoortortaqarnersoq, imaluunniit salluliornerunersoq Trump aperineqarami ima akivoq:

- Oqaatsit ilaat ilumoortuupput ilaallu ilumoortuunatik. Silap pissusiata allanngoriartornerata akiorniarneqarnissaanut sukataarutiginnittut ima ingasatsigilersimatigipput, anguniagassatut siunniussaat upperiuminaallillutik, Donald Trump oqarpoq.

Naalakkersuinermilu akisussaasumut eqqartuussivimmut Washingtonimiittumut sassartinneqarnini nakutitsinerulluinnartuusoq, Trumip ilanngullugu oqaatigaa.

- Tamanna USA-mut ajoqutaaqaaq, Trump oqarpoq.

AAMMA ATUARUK Trumpip avatangiisinik illersuisut aarlerisaaruteqartariaqannginnerarai

- Saarlerpaamut ingillunga peqquserluttuliortut kiinnaasigut nakkukkiartorlugit naalakkersuinermi akisussaasumut eqqartuussivimmi najuukkusukkaluarpunga, Trump demokraatit inuttaanik eqqartuutitinniaasut pillugit taama oqarpoq.

Trump Washingtonimut utinnginnermini ulluni marlunni Davosimiinnermini nuannisartorujussuusimanerarpoq.