Trumpip avatangiisinik illersuisut aarlerisaaruteqartariaqannginnerarai
USA-p præsidentiata, Donald Trumpip, aningaasaqarneq pillugu Schweizimi marlunngornermi ataatsimeersuarnermi oqalugiarnermini avatangiisinik silamillu illersuisut aarlerisaaruteqartariaqannginnerarpai.
- Nunarsuarmi avatangiisitigut ajornartorsiortoqarujussualernissaanik aarlerisaarisoqartuartarnera unittariaqarpoq, Donald Trump nunat pisuujunerpaat World Economic Forumimik taallugu Davosimi ataatsimeersuarnerisa ulluisa siullianni taama oqarpoq.
AAMMA ATUARUK Sermersuup aakkiartornera 90-kkunni aakkiartorneranit arfineq-marloriaammik sukkanerusoq
Silap pissusiata allannngoriartornera ataatsimeersuarnermi pingaarnertut eqqartorneqarpoq, inuusuttuaqqallu avatangiisinik illersuisut, soorlu Greta Thunbergitut ittut, aamma eqqartorneqarlutik.
- Ilimasupilunnissarput massakkut piffissaasorinngilara - isumalluartariaqarpugulli. Annilaangalluni qularlunilu iluaqutaanngilaq, neriulluarnikkullu siumut isigissaagut, Donald Trump oqarpoq.
- Aarlerisaarisut nunarsuarmi ullut naggatissaat nalliutingajalernerartarpaat. Nunarsuup inuttuallaalernissaa ilimasaarutigaat, nunarsuarmilu uuliaarukkumaartoq aamma ilimasaarutigaat. Socialistillu ingasattajaartut aningaasaqarniarnitsinnik ajalusoortitsinissaannut qaqugumulluunniit akuersiinnarnavianngilagut, Donald Trump oqarpoq.
USA-li orpinnik 1000 milliardinik ikkussuisoqarnissaannut suliniummut Davosimi saqqummiussamut ilanngutissasoq erseqqissaatigaa.
USA-p aningaasaqarniarnikkut siumukarnera USA-p præsidentiata oqalugiarnermini sammisorujussuuaa. Washingtonimi Senatip naalakkersuinermi akisussaasumut eqqartuussivimmut sassartinneqaleruttoraani Schweizimi oqalugiarpoq.
AAMMA ATUARUK Trumpimut unnerluussutit itigartitsissutigineqarnissaat piumasarineqartoq
Kina USA-lu aatsaat taama suleqatigilluartigisut aamma oqaatigaa. USA-llu aningaasaqarniarnera aatsaat taama patajaatsigisoq, tamannalu suliffissaaleqisut aatsaat taama ikitsiginerannik, akissaatit qaffannerannik suliffinnillu pilersitsiortornernik malitseqartoq, ilanngullugu oqaatigaa.
- Aningaasaqarniarnerput kikkulluunniit iluaqutigisinnaasaannik ineriartortipparput, Donald Trump ilaatigut præsidentimut ukiaru qinersinissamut qineqqusaarutitut nipilimmik oqalugiarnermini oqarpoq.
AAMMA ATUARUK Trump: USA-p Kina niueqatigiinnissamik isumaqatigiissuteqarfigaa
Donald Trump oqalugiareerluni aniartornermini Greta Thunbergip isornartorsiuinera qanoq isumaqarfigineraa aperineqarami ima akivoq:
- USA silaannarmik imermillu mingutsitsinerit annikillineqarnissaannut sulissuteqaleruttorpoq.