Trumpip ilinniartitsisut sakkoqartalernissaat kissaatigigaa
Floridami angut atuartunik toqutsereersorlu akerliussutsimik takutitsisoqaqattaarpoq, atuartullu annassimasut ilaqutaasullu præsidentip illorsuani ippassaq peqataapput.
Trumpillu nunap ilaani sakkoqarfiunngitsut piiarumavai.
Trumpip ilaatigut oqaatigaa, atuarfiit eqqaanni sakkoqarfiunngitsut atorunnaarsinnissaat kissaatigalugu, taamatuttaarlu ilinniartitsisut immikkut sakkoqarnissamut sungiusarsimasut sakkoqartalersinnaanissaannut isumassarsiaq tapersersorlugu.
AAMMA ATUARUK Atortut eqqarasuartaatinngortitsisinnaasut Trumpip inerteqqutiginiarai
Trumpi oqaaseqareersoq ataataasoq sakkortuumik qisuariarpoq.
Andrew Pollack paniminik annaasaqarsimasoq præsidentimut oqarpoq, Atuarfinni aallaasersortoqartalermalli ajornartorsiut aaqqiivigisimasariaqaraluaraat.
- Paninga maaniinngilaq aamma takoqqissinnaajunnaarpara - kamaqaanga, atuarfinni aallaasersortarneq aaqqiissuteqarfigineqarniarli! Tamanna tamatta suleqatigiissutigisariaqarparput, Andrew Pollack præsidentimut taama oqarpoq.
