Trump USA-mi qinersisartut akornanni oqaluttuarisaanermi aatsaat taama tapersersortikitsigisoq

Donald Trumpip politikkikkut sulinermi USA-mi qinersisartut akornanni aatsaat taama tapersersortikitsigaaq.

Qinersisartunik isumasiuisartup Ipsosip nutaarsiassaqartitsivik Reuters sinnerlugu inunnik isumasiuinerata tamanna takutippaa.

USA-p præsidentia qinersisartut akornanni 32 procentinit tapersersorneqartoq misissuinerup takutippaa.

Donald Trump præsidentitut 2025-mi januaarimi ivertinneqarami qinersisartut akornanni 47 procentinit taamanikkut tapersersorneqarpoq. Reuters taama allappoq.

Naammagittaanneruleriartorneq

Pingaartumik republikanerit akornanni qinersisartut Trumpimik tapersersuiunnaartut amerliartornerpaasut Reutersip allaaseraa.

Donald Trump Iranimik ukioq manna februaarimi saassussilermalli benziina dieselilu USA-mi akitsoriartuinnavissimapput.

Trumpip inuuniarnermi aningaasartuutit qaffakkiartunnginnissaannut iliuuserisai republikanerini qinersisartut akornanni siullerpaamik iluarineqannginnerulerput.

Inuuniarnermi aningaasartuutit tassaapput ineqarnermut, nerisassanut angallannermullu aningaasartuutit.

Qinersiviup qiterpaarnerani qinersinissaq qanilliartortoq

Qinersinivissap tungaanut novembarimi qinersigallartoqassaaq, Trumpip parteeqataasa USA-mi inatsisartunut kongresimut ilaatigut qinigassanngortillutik.

Innuttaasut sinnerlugit sinniisoqarfimmi, tassa Repræsentanternes Husimi ilaasortat tamarmik, Senatimilu ilaasortat pingajorarterutaat, qinersiviup qiterpaarnerani ukioq manna qinigassanngortipput. Qinersinissaq tamanna pillugu præsidentip politikkikkut ukiuni tulliuttuni marlunni sulinissaanut sunniuteqartorujussuusinnaavoq.

Inuuniarnermi aningaasartuutit USA-mi præsidentimut 2024-mi qinersinermut atatillugu oqaluuserineqartorujussuupput, amerikamiullu ulluinnarni inuuneranni aningaasartuutikinnerulernissaat Trumpip qineqqusaarnermi taamani neriorsuutigaa.

Præsidenti qinersisartut akornanni aatsaat taama tapersersortikitsigaluni qinersisartut akornanni qaammatip siuliani 33 procentinit tapersersorneqarpoq.

Naak Trumpip præsidentitut siulia Joe Biden, præsidentiunermi naalernerani tapersersortikinneruleriartoraluarluni qinersisartut akornanni taama tapersersornikitsiginngilaq.

Biden qinersisartut akornanni 2024-mi oktobarimi tapersersornikinnerpaagami qinersisartut 35 procentiinit tapersersorneqarpoq.

/ Ritzau.