Trumpip akitsuusiiniarnera akerlerineqartoq
Republikanerini senatorit nuimasut akitsuusersuiniarneq itigartitsissutigaat. Trumpillu nioqqutissanik Mexicomeersunik akitsuusersuiniarnera akerleriissutaalersinnaasoq, amerikami tusagassiorfik Politico allaaserisaqarpoq.
Trumpillu pilersaarutaa akimmisaartinniarneqarpoq.
Trumpimmi parteeqataaneersut senatorit akitsuusersuinissaq itigartitsissutigaat republikanerillu Senatimi siuttua Mitch McConnell naapertorlugu akitsuusersuinissaq taasissutigineqalerpat Demokraatit ilalerneqassasut oqaatigaa.
Mexicomit nioqqutissat tamarmik USA-mit immikkut 5 procentimik akitsuuserneqarnissaat juunip qulingani atuutilissasoq, præsidentip sapaatip akunnerata siuliani nalunaarutigaa, unioqqutitsillutik Mexicomit USA-mut qimaasut unitsivinneqarnissaata tungaanut akitsuutit qaffakkiartortinneqassasut Trumpip aamma erseqqissaatigaa.
Trumpip Tuluit Nunaanni pisortatigoortumik tikeraarnera naammassingajalerpoq, Trumpillu parteeqatini isornartorsiorpai - itigartitsinermi isumatusaarnerunngitsoq oqaatigaa aamma ilimagilluinnarpaa parteeqatini akuerseqataassasut.
