Trump præsidentinngorniunnissamut sassartitaassanngippat Haley Super Tuesdayimi angusarissaartariaqartoq
USA-mi republikanerit kina præsidentimut ukioq manna novembarimi qinersinissami sassartitassatut tapersersorneraat, naalagaaffinni 15-ini qinersisartut "Super Tuesday"-imik taallugu marlunngornermi qinersissapput.
Siornatigullu præsidentiusimasoq, Donald Trump, præsidentimut ukiaru sassartitaassanngippat, republikanerini unammillertutuaa Nikki Haley marlunngornermi angusarissaartariaqassaaq.
Nikki Haleylli angusarissaarnissaatut isikkoqanngilaq, taannami USA-mi republikanerit ukioq manna præsidentinngorniunnissamut sassartitassaminnik naalagaaffinni assigiinngitsuni qinersisarneranni naalagaaffimmi ataasiinnarmi maannamut ajugaavoq, tassa Washington D.C.-mi ajugaagami.
Trump naalagaaffinni soorlu Californiami, Texasimi, Alabamami, Mainemi Minnesotamilu tapersersorteqarluarnerusoq, inunnik isumasiuinerit takutippaat.
Trumpip naalagaaffinni 15-ini marlunngornermi qinersinerni republikanerit ukioq manna kingusinnerusukkut ataatsimeersuarnissaannut aallartitassanik pissarsinissaa, Trumpip qineqqusaarnermut allattoqarfiata nammineq eqqoriarpaa, Trumpillu republikanerit sinnerlugit novembarimi sassartinneqarnissaa sapaatit akunnerisa marluk tulliuttut ingerlaneranni qulakkeerneqassasoq ilimagalugu.
Trump naalagaaffinni Iowami, New Hampshiremi, Nevadami, South Carolinami, Michiganimi, Idahomi Missourimilu qinersinerni siusinnerusukkut ajugaalluareerpoq.
