Nikki Haley qinersinermi siullerpaamik ajugaasoq
USA-mi republikanerit ukioq manna præsidentinngorniunnissamut sassartitassaminnik Washington D.C.-mi sapaammi qinersimmata, siornatigut præsidentiusimasup Donald Trumpip unammillertutuaa Nikki Haley ajugaavoq.
Naliliisartut Edison Research taama nalunaaruteqartut, nutaarsiassaqartitsivik Reuters allappoq.
Nikki Haley republikanerit ukiaru novembarimi præsidentinngorniunnissamut sassartitassaminnik USA-mi naalagaaffinni assigiinngitsuni maannamut qinersisarneranni Trumpimut aatsaat ajugaavoq.
Naallu Nikki Haley Donald Trumpimut Washington D.C.-mi ajugaagaluartoq, republikanerit sinnerlugit novembarimi sassartitaassanersoq ilimanarpallaanngilaq.
Præsidentiusimasormi USA-mi naalagaaffinni assigiinngitsuni qinersisarnerni Haleymut siuaqqalluarpoq.
Trumpip Haleyllu unamminerat aqagu naammassineqartutut oqaatigineqarsinnaaleriissaaq, republikanerimmi USA-mi naalagaaffinni assigiinngitsuni 15-ini Super Tuesdayimik taallugu marlunngornermi qinersissapput.
Naalagaaffinni taakkunani qinersinermi inernerit aallaavigalugit paasinarsereersinnaavoq, kina republikanerit sinnerlugit præsident Joe Bidenimut novembarimi unammillertaassanersoq.