Trumpip Biden USA-p naalagaaffiini qinersinermi naligiiffiukkajuttuni angujartuaaraagooq

USA-p præsidentia Donald Trump Floridami qinersisartut akornanni amerlanerujartuinnartunit tapersersorneqalerpoq. Nutaarsiassaqartitsiviummi Reutersip inunnik isumasiuisartut Ipsos suleqatigalugit inunnik isumasiuinerata kingulliup maanna takutippaa, Trumpip demokratillu sinnerlugit qinigassanngortittup Joe Bidenip akornanni naligiittoqartorujussuanngortoq.

USA-mi præsidentimut novembarip ulluisa pingajuanni qinersisoqarnissaanut sapaatit-akunneraajunnaartorlu qinigassanngortittut naalagaaffimmi Arizonami aamma naligiittorujussuusut kisitsisit takutippaat.

AAMMA ATUARUK USA-mi tusagasiuutit: Oqallinneq Trumpip Bidenimit nuanarineqarnerulissutiginngikkaa

Reuters/Ipsos naalagaaffinni arfinilinni, tassa Wisconsimi, Pennsylvaniami, Michiganimi, North Carolinami, Floridami Arizonamilu isumasiuisimapput.

Naalagaaffiit taakku Trumpip præsidentitut aappassaanik qinigaanissaanut, unammillertaataluunniit Joe Bidenip Det Hvide Husimut qinigaanissaanut pingaaruteqarput.

Joe Biden isumasiuinerni tamani siuttuugaluartoq naalagaaffinni arlalinni assigiinngissut ima annikitsigaaq allaat naligiilluinnartutut taasariaqarlutik.

AAMMA ATUARUK USA-mi præsidentinngorniuttut qinersinnginnermi kingullermik oqallissasut

Nuna tamakkerlugu isumasiuinerit ataatsimut isigigaanni Joe Biden siuttuulluarpoq.

USA-mi qinersisinnaatitaasut akornanni 70 millionit sinnerlugit qinersereerput, qinersisoqarnissaatalu tungaanut amerliartuinnavillutik.

US Election Projectip University of Floridameersup nalunaarsugaasa tamanna takutippaa.